我羅拉最近睇咗聽日就會喺香港上畫嘅《地心浩劫》，呢部戲係講地球核心突然唔轉，令到世界各地發生離奇災難，軍人Rebecca就被調派做太空人，坐穿梭機直搗地球核心，引爆核儀器，希望令地核磁場重新推動。
而Rebecca呢個角色，就係由金像影后希拉莉史雲克（HilarySwank）扮演嘅，不過早排佢接受專訪嘅時候，竟然話自己其實唔鍾意睇科幻電影同小說。
雖然希拉莉對科幻題材冇乜興趣，不過我羅拉就覺得佢喺戲入面嘅表演唔錯喎！原來佢係有秘技嘅，希拉莉話：「我拍呢部戲嘅時候，去咗一個叫Susan嘅女太空人屋企住，佢嘅背景同女主角好似，佢哋都係空軍，然後被調派去做太空人。我就將Susan融入故事，用佢嘅諗法嚟演繹部戲。」
新戲用世界末日做題材，希拉莉就話：「911之後我對世界末日有咗新睇法，我哋要享受生活，好似我鍾意紐約，所以就住喺度，如果我搬去第二度，咪畀恐怖主義得逞囉。」