前日曼聯官方網公布咗「你最想下季買邊個荷蘭球員」嘅投票結果，巴塞隆拿前鋒古華特以高票數成為眾望所歸。查實費爵爺想簽古華特好耐，曼聯球迷似乎普遍都幾贊成，唔知爵爺願唔願意聽取民意，順水推舟嘞。
古華特嘅得票率接近百分之五十五，比第二位嘅阿積士尹達華特（百分之十點七）同埋祖雲達斯嘅戴維斯（百分之十點五）多好多。費爵爺已經唔止一次講過好欣賞古華特，當年收購更接近成事，加埋呢個投票結果，可能增強費爵爺嘅收購意欲，搵佢同雲尼斯達羅組成荷蘭雙箭頭。
不過咪話我求大俠唔提醒各位曼聯躉，古華特同雲尼斯達羅響國家隊合作好少有波入，曾被指為近年荷蘭最差勁嘅組合，如果古華特真係投曼聯，唔知會唔會……。
迪高第一次代表葡萄牙就幫隊波砌低巴西，連日嚟聽聞拉科魯尼亞同埋祖雲達斯都有意簽入呢個風頭躉。迪高就親口表明心迹希望加盟祖記。我求大俠只係睇過佢踢波一次，唔想太早評論佢球技，之但係睇佢都係技術型球員，射入嗰球自由球係趁巴西人牆漏洞射入，咁機警，無論去意甲或西甲都應該有立足之地。
貴為聯合國大使嘅羅馬球星托迪，日前響電視睇見伊拉克細路仔嘅苦況，心都實埋；佢話想盡吓責任，盼盡快到伊拉克做親善探訪；惻隱之心人皆有之，好似托迪呢啲咁有份量嘅球星肯企出嚟帶頭行善嘅話，世界一定更美好，我求大俠舉腳贊成。
我求大俠之前講過唔少加斯居尼衰嘢，好嘞，諗住佢響甘肅天馬落班後會好世界，但聽講因為甘肅天馬恃住「加薩」嘅名氣，但凡有傳媒採訪都要收錢，盛惠六百美元。呢個做法令國內傳媒相當不滿，搞到天馬隊前日到達杭州無咩傳媒採訪。由於報道少，甚至杭州球迷都唔知天馬隊幾時到埗，想接機都唔得。
早兩日英格蘭傳媒大事報道李華度向利物浦送秋波。消息一出，利物浦領隊侯利亞就話無意買李華度呢類貴價球星。唔知李華度係咪聽到佢講，即刻話其實自己無接觸過紅軍高層，只係講過想退休前去英超玩吓。唔知係呢個老波骨幫自己搵下台階，定係傳媒真係曲解佢意思嘞。