楊永強喺立法會斥責劉慧卿，引到幾下掌聲，譬如活力先生與李純恩都喺專欄中支持楊永強，話佢發火有理。
外人容易俾楊永強迷惑，內行人就唔係咁睇。證券界女強人嘅細妹係私家醫生（姑稱之為醫生L），日日打開醫務所道門，心裏都有驚惶，好怕成為第二個劉大鈞醫生，要入瑪嘉烈醫院。醫生L既擔心病人傳染「沙士」畀自己，又惦掛自己啲同學，喺威爾斯醫院內與病魔搏鬥。醫生L對女強人講：「楊局長係反應慢，意圖downplay（低調處理）整件事，現在事情擴大咗，佢就脾氣躁，我認為劉慧卿啱呀！」
聽講威院醫生好多苦水，即猛咁用e-mail向同行朋友同學傾訴，對楊永強不滿嘅故事就逐啲傳出嚟，加上楊永強最初堅持話「沙士」冇響社區擴散，俾中大醫學院院長鍾尚志教授含淚踢爆，楊局長就對威院唔多「乃奇」；之後，素來敢言嘅梁秉中教授又寫文章，又帶記者上廣州拍攝廣州醫院嘅「沙士兵臨城下」嘅狀況，廣東省先至宣佈患上「沙士」嘅數字（至二月底），間接篤穿楊局長話與廣東省有溝通嘅神話。呢啲中大教授咁唔聽話，楊永強有乜辦法唔火上頸，俾劉慧卿一篤，立即鬧番轉頭。
「沙士」擴散之後，暫時難以遏止，但威院嘅中大醫科生（病人）已陸續出院，相信威院已有辦法醫治SARS，不過恐怕威院與楊永強嘅關係，以後有排醫。