昨日突然發生好多事，壞消息一單接一單。雖然一眾經紀老友都估計，個市今日有機挾一挾上去，但小初同大部份散戶一樣，都係無心炒作。不過，古仔則照樣聽，唔想好似上次新灃（1223）炒業績走寶。
經紀陳話，科達集團（673）公布配股唔成，但會借機炒作，重話幕後炒家做好準備，諗住就算在淡市之中，都要突圍而出，做場好戲咁講。
科達噚日公布，配股予國康醫藥器材交易終止，但股價竟然大升9%，收0.96元。
經紀陳話，據聞科達其實未放棄配股畀國康，重諗住一旦配股成功，引入國康做大股東之後，會在生物科技方面有所合作。小初心諗，咁同變相賣殼有乜分別。
至於炒唔炒得成，睇番科達早前大比例併股，似乎街貨都收得七七八八，要炒上其實唔太難，問題主要係有冇水源支持，加上現時咁嘅市況，炒得起亦未必有人跟。
慕容小初