昨午開市後，謠傳本港宣布成為疫埠，恒指散到8465全日最低，跌幅168點，跟住3時3刻，當局聲明冇咁嘅事，恒指好快彈上8596收市，全日只係唔見37點，期指更有68點升幅，由低水143點變為37點。
由昨日午市嘅變化睇嚟，如果再冇壞消息，例如肺炎每日統計數字「增幅放緩」，個市隨時反彈，造淡嘅要打醒精神，因住挾淡倉。
個別股票因超賣而反彈，國泰（293）宣布減航線，壞消息嚟，不過股價則反彈15仙，國泰冇窩輪掛牌，冇得評論。太A（019）收31.60元，升70仙，Call輪9475由5仙彈上5.5仙，升幅1成。
隻輪下月尾到期，溢價5.8%，槓桿率57.5倍。計埋太A除息90仙因素，隻輪實際溢價係8.9%，槓桿率在55倍以上，𠵱家已成細價仙輪，未來波幅仍然好勁。
九倉（004）派成績表，股價變化好誇張，收13.50元，散13%，好多股仔跌幅都冇九倉咁厲害。九倉Call輪9476有難，收5.6仙，碌低61%，6月中到期，溢價7%，槓桿率24.1倍。
隻輪行使價13.88元，正股股價相差唔大，隻輪暫時輕微價外，有一定值博率，當然相對風險亦唔細。
章盛