香港回歸後禍事接踵而來，先有金融風暴，跟住來個「八萬五」搞到全港負資產，港人輕則損失數年人工，重則損失半生積蓄兼破產。
現時經濟差失業率高企，還來一場肺炎疫症，港人的要求已由一份穩定職業降至保住生命，遇上這一連串「不幸」，香港人到現在只是鬧鬧政府出氣，同埋搶購糧食而已，尚未出現暴亂，香港人的EQ及忍耐力其實算相當高，這亦是不幸中之大幸。
噚日傳出香港成為疫埠，令到大市一度下挫169點，連8500亦失守。不過黑客話，唔少大戶趁機平淡倉，令到大市跌唔落，恒指收市跌幅收窄至37點，報8596，成交則高達84.91億元。國泰航空（293）更反彈1.6%，報9.65元，成交3.36億元。阿虎初時以為有大戶想利用假消息製造市場混亂以便平淡倉，兼挑戰《證券及期貨綜合條例》，但其後證明是有條靚仔盜用某某新聞網頁名義發放疫埠假消息。雖然噚日係愚人節，但唔使咁大整蠱啩。
麗展（488）及豐德麗（571）雙雙停牌，由於豐德麗財務顧問呼籲股東唔好接受0.28元收購價，市場隨即揣測麗展會調高收購價，或索性放棄私有化計劃。個多月前，市場重傳麗展會調高收購價，或者香港經濟因為肺炎潮而變差，麗展心意可能改變。
九倉（004）噚日大跌13%，收報13.50元，成交4.31億元，成個洗倉格。Cookie話，聽講光頭佬隻基金嫌佢派息減少，所以沽咗唔少貨。事實上，現時唔少公司都大派高息，九倉則要削股息，完全唔符合潮流。
阿虎