金像影帝羅素卻爾（RussellCrowe）同佢女友丹妮爾（DanielleSpencer），將會喺今個月七號結婚，正式拉埋天窗，其實佢哋前前後後識咗十三年，而喺澳洲生活嘅丹妮爾亦等咗羅素咁多年，𠵱家總算守得雲開見月明。
可能有唔少讀者會問：「究竟佢哋兩個係點識呢？」就等我羅拉八畀大家知啦。羅素同丹妮爾喺九○年拍攝澳洲電影《TheCrossing》時認識，佢哋分別擔當男女主角，當年已經有男友嘅丹妮爾，同仍然係英俊小生嘅羅素飾演情侶，兩人喺戲入面有唔少埋身肉搏鏡頭，初出道得二十歲嘅丹妮爾重要赤裸露點上陣，都咪話唔大犧牲。
可能由於佢哋成日喺戲入面親熱，加上羅素專撬牆腳嘅本性，兩人好快就打得火熱，不過佢哋嘅感情只係維持咗五年，隨住羅素去荷李活發展而無疾而終。經過多年拈花惹草之後，羅素終於明白茶是故鄉濃嘅道理，上年同丹妮爾舊情復熾，並且發展至今日談婚論嫁嘅階段，總算可喜可賀。