香港打工仔舊年普遍面對減薪威脅，但打工皇帝就零舍唔同。八方噚日睇和黃最新發表嘅年報，佢哋舊年四名最高酬金嘅董事，個個都豬籠入水，其中最威嗰位，加咗二千萬，總共有一億二千五百萬元，升幅約兩成。
一般相信，呢名打工皇帝非董事總經理霍建寧莫屬。有人估計，霍大班身家起碼二十億，你話唔係尊重誠哥，佢重使唔使打工？他日佢唔撈，搵邊個接班呢？另外三位高酬嘅董事，酬金亦由前年介乎二千五百五十萬元至二千八百五十萬元，增加到去年嘅三千二百五十萬元至三千五百五十萬元，升幅百分之二十四至二十七。
至於主席李嘉誠，舊年繼續支五萬元董事袍金，並無任何管理薪酬，有關袍金已上交長實。
傳真︰2623-9278
電郵︰