呢排病毒肆虐，相信好多人都會乖乖地安坐家中，唔敢輕舉妄動，我哋一班靠足球搵食嘅行家，因為歐洲嗰邊西線無戰事，夜晚相信亦早瞓咗，不過喺到我就想彈一彈梳打埠班專家開盤嘅策略，選擇性開盤得嚟，有時少得離譜！
好似嚟緊禮拜三深夜咁，應該有成十六場國家盃比賽，但打開梳打埠彩票公司嘅網頁，發覺嗰賽程表只得六場比賽開盤咁大把，即係話佢哋一如以往做法，對賽雙方實力差距太遠而又冇直播嘅話，佢哋寧願唔做生意。
其實有時你認為實力懸殊嘅比賽，都不乏希望博大熱過關或者扒大冷嘅波友，所以你會見到外國網頁熱到1.01倍W都有得買；正如上個禮拜六，德國主場畀立陶宛迫和，捧梳打埠嘅朋友就冇得刨嘞。貴公司成日都話，開得門做生意，畀波友多啲選擇，希望佢哋今晚開盤時候，開多幾場啦！
日前英格蘭二十一歲以下國家隊以二比四輸畀葡萄牙，跟住嚟緊禮拜二要對土耳其，由於有阿美奧比同巴布爾停賽，卡域克又受傷，搞到領隊柏列告晒急，終於向大國腳方面班救兵，而領隊艾歷臣亦都好識做，放前鋒謝菲斯及中場真拿斯出嚟，令柏列喜上眉梢。我求大俠就話，呢個人情債，柏列你將來記得還呀！
好多籃球迷同我求驗客一樣，都好希望佐敦呢位老人家收山最後一年可以打入季後賽；不過佢隊巫師就真係冇乜法力，噚日對聯盟第一魚腩金塊，開頭係就係虎虎生威，領先十四分，不過下半場跌晒Watt，搞到倒輸十六分而回，重俾公鹿搶番東岸第八位；睇番巫師剩番嗰九場，有五場作客，主場又要對帝王同76人呢啲硬嘢，巫師班靚仔再唔生性，入季後賽真係凍過水。
如果以為俾聯軍狂轟嘅伊拉克𠵱家好似一個死國咁就大錯特錯，因為該國足球並冇因戰火而停息。日前伊拉克國內聯賽照踢，有成五千球迷免費入場睇㖭。比賽除咗俾到苦難嘅國民一啲娛樂外，亦正好向世人宣示伊拉克並未因戰火而退縮。我求大俠就認為足球魅力真係沒法擋，聯軍或者可以炸毀伊拉克，但要摧毀足球就真係諗都諗唔好諗嘞！
呢個世界有好多惡人，足球當然唔例外，但係死硬派拉素球迷就真係「和尚打傘，無法無天」！話說前排有八個拉素球迷又因為搞事而被捕，好大機會要坐監，點知有五十個死硬派拉素球迷夠膽死包圍監獄，重有另外五百個球迷聲援。我求大俠呼籲意大利警方唔可以再手軟，否則惡棍當道，真係搵鬼入場睇波嘞。