面對勢兇夾狼的非典型肺炎菌，好多人都會避免出街，就算出街都會戴上口罩，保障自己。其實只要有足夠的自保裝備，注意個人衞生，即使出街Shopping、食飯甚至唱K都可以放心。綜合各醫生和衞生署的指引，各位若要去人多擠迫的公眾場所，不妨依照以下的自保要訣。
記者：區佩嫦
攝影：周旭文
ImageGirl：Cathy
a﹒口罩隔飛沫
到鬧市逛街，選用外科口罩已經有保護作用，用時記緊將口罩緊貼面部，而且完全覆蓋口鼻和下巴，避免有罅位俾飛沫有機可乘。
b﹒戴帽防菌
病毒的懸浮粒子會藏身於頭髮，所以長頭髮的女士們最好將頭髮束起，再戴埋帽包到實一實，減少頭髮在空氣中暴露。每日返到屋企都要洗頭，避免頭髮內的病毒在屋企散播。
c﹒染酒精濕紙巾抹手
每次摸完物件後，最好用染酒精的濕紙巾抹一抹手。一般染酒精的濕紙巾都能有效清潔雙手，當然含70%酒精的消毒火酒棉最為有效殺菌，不過亦有機會刺激雙手的皮膚。
d﹒易洗Tee最好
出街宜穿着一些可以用洗衣機清洗的衣物，如T恤、牛仔褲、恤衫等。由於乾洗的乾淨程度較濕洗差，故乾洗的衣物如西裝、絨布等就盡量避免穿着。
e﹒隔巾摸物
由於病毒可生存三至六小時，所以接觸任何公共設施如電梯或扶手電梯時，最好用紙巾隔一隔，避免直接接觸病毒。
獨立衞生咪套
我哋去咗某間連鎖卡拉OK唱K，佢哋每支咪都送一個獨立包裝咪套，個套用薄身的網布做，用完後，服務員會將咪套用膠袋包好，然後棄掉。
膠袋封遙控器
其實遙控器都不可忽略，為安全起見，遙控器都係用自備的保鮮袋包住會放心啲。
殺菌噴霧噴風口
我會建議各位用消毒噴霧噴一噴冷氣機的出風口，避免或減少病菌在空氣中傳播。
出外用膳，最好帶備用完即棄木筷子及預備一對公筷，這樣可避免口沫將細菌傳播開去。用膳前當然要用皂液洗手，然後用即棄紙巾把手抹乾。