恒生銀行前高層壽明因收受利益入罪，被判監四年，刑期與南非StandardBank前香港分行主管相同，兩位資深賓架，一外籍，一本地華人，均有豐富經驗，因相似罪原因入冊，聞者惜之，亦有「卿本佳人，奈何作賊」之嘆。
賓架靠份人工，其實好難發達，最多係薪高糧準，福利優厚，公積金豐盛，能維持上流生活而已，除非擁有好多銀行股票認股權啦。正因如此，歷年來，不分中外，都有賓架受唔住誘惑，收受客戶送禮或甚至巨額紅包，導致身敗名裂。
前輩賓架以前有一位夥計，為人老實，服務態度良好，亦盡量幫助借錢嘅客戶。一位人客因此趁過年，送他一個大紅包，超出普通利是好多。夥計拆開利是封之後，知道唔收得，立即將筆錢存入該位人客嘅銀行戶口，並將存款收條寄番畀人客，當係客戶服務。人客收到之後，自己都覺得唔好意思，以後冇再送禮。銀行家收禮呢回事，可大可小；收大錢而坐監，都該心甘命抵啫，收少少而誤了前程就慘無人道。前輩賓架有一位東南亞同業，身為老總，曾經批准一單六百萬美元貸款畀某客戶，某客戶過年特送咗一個利是畀佢嘅仔，賓架收下，約係二千港元，存入兒子儲蓄戶口，不以為意。誰知三年後，該人客破產，破產官搵到一條數（約二千港元）送畀銀行家，於是告入官府，指銀行家批准貸款之後，收受利益。結果銀行家被炒兼坐監，前途盡失。