學校上星期應否停課，特區政府又上咗一道議而不決嘅例牌菜，而李國章就錯過一次辭職良機。
其實上周二李局長好似被人搵支槍指住咁話：「停課可以話係一個好容易嘅決定，亦會得到很多掌聲，但係作為一個負責任嘅政府，就要再深思一層，係咪正確呢？」咦，乜啲台詞咁熟口熟面，十足老董喺度講嘅？
果然當日就傳出老董力排眾議，要議多一會先作決定，究竟佢知唔知威院深切治療部顧問醫生，十八號已經唔畀個仔返學？唔通市民叻過醫生？
事隔兩日，家長學生群情洶湧，連自己個孫都唔返學，於是佢老哥又以教統局之名，宣布停課。老董點頭，李局長就好辦事。唉，咁嘅領袖，邊個幫佢邊個死，唔怪得一位政圈前要人慨歎，李局長真係錯失良機，當日就應打蛇隨棍上，老董唔肯停課，就乘機辭職唔撈，以示清白。
傳真︰2623-9278
電郵︰