唔少商場都會在大時大節搞活動，好似房委會旗下六個商場，原定嘅復活節特備節目仍然繼續，包括樂富中心二期、藍田啟田商場、黃大仙中心、何文田廣場、大埔太和商場同油塘鯉魚門廣場，將會由12號到21號，以懷舊做主題，迎接復活節。但係近排非典型肺炎搞到滿城風雨，市民出街都要諗過，唔少旺區都人流稀疏，商場搞活動都可能冇人到。
講番房委會嘅安排，各個商場都有主題，好似樂富中心二期係古典美人顯舞姿、啟田商場就有懷舊名人扮嘢大比拼。
每個商場都請到唔少藝人做嘉賓，最大陣仗係12號，喺樂富中心二期嘅開幕禮，當日司儀係李麗蕊，開幕嘉賓係郭晉安同楊婉儀，表演嘉賓有Rosemary、溫碧霞、陳淑蘭、陳雅倫同姚樂怡。在明星效應下，可能會吸引到一啲唔想屈喺屋企過節嘅市民出街都未定。
蘭西啱啱收到中原測量師行一份創刊月報，內容係圍繞市場最關心嘅話題進行探討，同時又會就一啲特別題目，用專業角度加以講解，將有關地產同測量界熱門話題，公開畀市場知，大大增加市場資訊流通。
第一期由中原測量師行董事總經理黎堅輝親自執筆，主題係關於全面撤銷租金管制，可以為樓市引進新動力。
中原測量師行前身係中原物業顧問行，係中原集團嘅全資附屬公司。
肺炎病毒持續擴散，全城加緊防範，聘用三千幾名員工嘅美聯物業，不停向員工灌輸預防肺炎措施，除加強身體抵抗力之外，更取消集體活動。
該行原定今個禮拜四舉行每月例會，數千名員工將會出席，但受近期肺炎不斷擴散影響，決定取消，避免員工出席大型集會而感染病毒。公司懷孕職員可獲有薪假期，免於工作期間受感染。
地產市道受影響，估計交投持續減少，該公司亦建議員工考慮現階段放有薪假期，淡市充電，待旺市再出擊。該公司會密切留意肺炎事件，以作出相應行動。
城中唔少食肆同卡拉OK，喺非典型肺炎下都冷冷清清，業界人士透露，過去一個禮拜，有啲計劃開業嘅酒樓、卡拉OK，擔心疫症持續擴散影響生意，開舖都係白做，最終放棄租舖行動。
一間原本打算租上環區近二萬呎樓面嘅酒樓啱啱轉軚，決定唔租舖。間舖每月租金約二十五萬元。
行內人士估計，近期臨門一腳無簽租約嘅卡拉OK、食肆，至少有十單八單，以每單平均月租二十萬元計算，每個月唔見咗二百萬元生意額，經紀期望病毒唔再惡化。
非典型肺炎個案與日俱增，個別屋苑全幢大廈更宣布要隔離，可謂人人自危，大家都盡量避免到人多聚集嘅地方，因此，個別機構決定押後舉行記者招待會。
上個禮拜話明日開記招嘅萊坊國際，啱啱通知話記者會要延期，原因係非典型肺炎襲港，但幾時至開，咁就唔知嘞。
蘭西
電郵地址：
