非典型肺炎襲港，令到容納萬多人的紅館演唱會應否取消及延期受到關注，昨日多個製作單位與紅館方面開會後，透露「左麟右李」演唱會將如期舉行。不過鄭經翰昨日批評今次決定，認為非常時期應採取非常措施。
原定今個月在紅館舉行的演唱會，包括譚詠麟與李克勤本周五舉行的「左麟右李演唱會」、「黃霑獅子山下演唱會」、汪明荃的「明荃明曲明星2003演唱會」及「靜婷金禧演唱會」等，就上述演唱會是否取消，昨日多間製作公司，包括有份製作「左麟右李」的雅柏公司負責人陳達志（Ba叔）、恒藝亞洲負責人丘亞葵、張耀榮娛樂製作公司和東亞娛樂的代表等，親到紅館與紅館高層舉行會議，結果「左麟右李」獲准如期舉行。
Ba叔說：「阿倫同克勤佢哋唔使取消，但之後嗰啲就要再傾吓，暫時冇條例禁止喺紅館搞騷。」記者問觀眾若要求退票又怎樣處理，但Ba叔表示他們沒有退票安排。
至於丘亞葵則表示，紅館已答應做足一切預防措施，包括為冷氣槽和座位清洗消毒，以及派發口罩等。不過丘亞葵擔心演唱會門票銷路受影響，由於Beyond演唱會門票尚未公開發售，演唱會是否如期舉行要再研究決定。
據悉不少製作公司為安全起見，原本希望紅館能騰出其他檔期以便延期舉行，沒料到紅館代表昨日一開會便表明立場，指紅館今年檔期全部爆滿，一位有份參與會議的代表向本報記者說：「佢哋一開始就話『今年個期滿晒，你哋唔使諗啦。𠵱家演唱會可以照做，但取唔取消你哋自行決定啦。』佢哋唔准撻訂，唔准改期，佢哋推卸責任，將個波交畀我哋，萬一真係發生問題，責任就係由主辦單位負責，唔關紅館事，佢哋真係麻木不仁！政府應該畀一個明確嘅指令我哋，而唔係叫我哋自己諗辦法。」
而鄭經翰昨日接受電話訪問時則說：「演唱會應該即刻取消啦，如果政府唔決定，都要迫佢決定啦，等我即刻打電話去問吓康文署（康樂及文化事務署）署長點解唔取消，咁唔啱㗎嘛！我嘅意見就係演唱會即刻取消，政府當然唔可以照收場租啦，但係政府又未必畀到另一個期佢哋，所以主辦商都要做定預備會有損失，佢哋唔可以去追究政府。人哋外國歌手TheRollingStones、Santana、Moby都取消演唱會啦，點解本地歌星唔可以？唔可以只係睇錢嘅嘛，非常時期梗係要有非常措施啦。」
記者致電康文署署長王倩儀，王署長說：「場館會繼續開放，但取唔取消由主辦單位自行去決定，場館措施完全冇問題，我哋會做足一切清潔消毒。」消委會至昨日為止，只收到一個投訴個案，指「左麟右李」不肯退票，惟消委會指主辦單位若不取消演唱會，消費者實難要求退票事宜。
此外，王傑於本月二十日於紅館舉行一場演唱會，現在可能要取消，王傑說：「我覺得呢個係好主意，因為一場演唱會有成萬人睇，如果有三、四個係帶菌者，後果真係好嚴重，所以佢情願賠錢，好過賠命畀人啦！」
採訪：張止寒、戴彩煥、胡比
