肺炎加上證券新例今日起實施，所以小初唔少經紀老友都冇乜心機，其中有位負責芬佬客戶嘅經紀老友更話，佢個芬佬客連工都唔肯返，話要避肺炎喎，搞到佢靜上加靜，分分鐘以為自己好似淘大花園嘅居民咁，已經被隔離。
經紀黃話，部份芬佬噚日反應好激，好似真係打到嚟咁，成個洗倉格局。好似威鋮國際（1002），因為公司中期業績盈利倒退，傳聞被芬佬洗倉，搞到股價勁跌36.17％。
威鋮噚日最低見過0.27元，收0.30元，成交金額就唔夠1千萬元。小初睇見隻股咁跌法，起初重以為有人被斬倉。
經紀黃話唔係，威鋮早排成交一度急增，因為有班芬佬買貨捧場，但點知隻股剛剛公布截至2003年1月底止中期業績，盈利只有1773.9萬元，比起去年同期大跌43%．令到芬佬大失所望，沽貨走人。
小初心諗，以往芬佬沽貨還沽貨，好少會搞到要錢唔要貨咁嘅款，現時只可以用人心虛怯來形容。
慕容小初