肺炎擴散之影響比中東戰爭更大，港股噚日大跌228點，收報8634，成交達85.43億元。期指更跌329點，跌破8500，收報8491，大幅低水143點。世衞話肺炎病毒有可能透過空氣傳播，若果揣測屬實，香港今次真係大大鑊，8500邊度守得住。
滙豐（005）通過收購Household，噚日見到大摩，高盛及瑞銀等力沽，不過滙豐企硬喺80元，都算夠硬淨。黑客話，大摩好似使橫手掃入唔少貨，都唔知佢真沽定假沽。不過，若美股周一大散，滙豐要守住80元，相信都好難。
新世界發展（017）完成重組後，股價不斷向下尋底，噚日大跌7.8%，收報2.675元，成交達4379萬元。新世界現時市值只得58.63億元，重細過恒隆集團（010），睇嚟新世界有機會被剔出恒指成份股之列。
國泰（293）噚日再跌6.86%，收報9.50元，成交達3.95億元。基金繼續進行洗倉，但似乎仍有唔少基金為派息吸納國泰，阿虎相信今次貪息者好易蝕大本。
Cookie話，肺炎事件已引起世界各國關注，部份國家計劃唔畀香港及內地人士入境，若肺炎仍然不受控制，可能連貨都唔畀入境，到時利豐（494）等出口股勢必受到影響，即使畀貨物入境，都可能要花費唔少成本在消毒方面，令盈利受損。
恒豐金業（870）受惠於國內旅客來港買金之風，而隻股一向有炒家維持秩序，不過最近肺炎病毒太惡，搞到炒家都開始撤退，股價近日累積下跌逾兩成，若承接力持續不足，隨時會引發投資者進一步拋售。
阿虎