繼萬事得車廠公布咗上月製造及銷售汽車成績後，日產亦於日前派發上月嘅成績表，與2002年2月相比有明顯增長，表現可謂十分出色。
2003年2月於日本本土廠房生產嘅汽車數目，若連商用車計算在內，總數多達138,751部，較2002年同期勁升21.5%，廠方表示能錄得如此成績，係因為全新Teana車系於本土有龐大需求量外，March（見右圖）、Cube及FairladyZ（即港版350Z）亦成為車迷追捧對象，故此有關方面須提升產量，方能滿足需求。至於位於海外嘅生產線亦錄得5.1%升幅，產量達110,224部；若以分區計算，其中又以西班牙廠房升幅最為強勁，於上月合共生產咗9,384部新車，升幅高達68.7%。
賣車數字亦錄得雙位數字百分比升幅，於上月日本本土共售出81,042部新車，較去年同期上升18.6%；就連歐洲及墨西哥等地區都錄得升幅，唯獨美國售出車輛數目只有51,225部（下跌12.2%）。另一方面，由日本製造並出口往國外嘅汽車數量，私家車有51,231部（升幅為31.1%）、商用車則有9,374部（下跌15.9%），若將兩者加埋的話則有60,605部，平均升幅高達20.6%，表現可謂十分出色。
相信日產多款新車相繼於各地市場正式推出後，今年嘅業績定會更好呢！