趙飛雲自問EQ唔算低，98年官鱷之戰，港股一日成交700億元，大鱷來勢洶洶都未有嚇親，但今次肺炎襲港，則有些少腳軟，噚日深居簡出冇上股票行，留喺屋企上網睇市，竟然發現亞視原來重播緊「秋官」嘅《世紀之戰》，丁蟹又再現身。世事真係何其巧合，秋官「股市災星」之名，相信都好難洗得甩。
其實美股上周五跌幅唔算大，杜指跌0.68%，納指跌1.06%，但開市前肺炎重災區淘大花園宣布封樓隔離，消息進一步打擊港股，恒指裂口低開108點後，持續向下，低見8586，尾市雖有反彈，最後仍跌228點，收8634。
港股今次走勢相當不妙，昨日已輕微跌穿01年年延伸至今3底長期支持軌8700，若確認跌穿，就算以量度跌幅比例計，亦要反覆下試6300。不過，恒指同期9RSI仍未跌穿升軌及出現底背馳，並非全無扭轉劣勢機會。
雖然趙飛雲唔係太想發災難財，但作為市場炒家的部署，恒指短期若無法重上支持軌8700之上企穩，應追入恒指Put輪9619，但只宜小注怡情，無謂太搏命。
倉內意科（943）受大氣候影響，終於跌穿20日線支持（現處0.26元），趙飛雲遵守紀律於0.255元沽出止蝕。雖然側聞隻股應該未玩完，但炒三四線股最重要係守紀律。
趙飛雲