保鮮紙包頭防埋肺炎？
馮仁昭四圍超：關心妍爭仔出毒招

關心妍（Jade）日前同JCGroup嘅新人葉山豪合作拍攝新歌《優先訂座》卡拉OK嘅MV，阿Jade喺MV入面係第三者，佢好想留住男友葉山豪，於是係咁幻想畀咗杯飲品男友飲後，男友從此聽晒佢話。

焗咗成粒鐘
阿Jade重為咗令佢同男友嘅感情永遠保持新鮮，竟然諗到用保鮮紙包實男友個頭，我馮仁昭都服咗佢。
阿Jade事後大讚扮佢男友嘅葉山豪好專業，佢話：「佢俾保鮮紙包住個頭拍咗大半個鐘，咁焗都冇呻過一句，真係好專業。」如果咁都冇焗親，以後包保鮮紙嚟防肺炎咪一流？但馮仁昭就真係唔敢試。

要男友聽話
問阿Jade現實生活係咪都要男友聽晒佢話，佢就咁講：「某程度上，我都要男友順晒我意，可能之前嘅男友都對我千依百順，寵壞晒我囉。」阿Jade話呢首歌講第三者嘅內心感受，所以唱完都好體諒嗰啲人嘅苦衷。

莫文蔚豬籠入水
莫文蔚（Karen）近排接咗好多廣告，包括內地健康穀物食品同力士洗頭水廣告。Karen日前戴住口罩坐港龍客機來往北京，原來就係以代言人身份去人民大會堂，出席健康食品廣告商舉辦嘅健康活動。Karen話佢拍呢個廣告，同一班唔同國籍嘅小朋友一齊拍，一齊食嘢，一開工心情就好開朗。

Shine唔識死！
二人組合Shine噚日喺大埔幫Roadshow拍嘢，佢哋兩個落車都唔戴口罩，反而班fans就戴晒口罩。Shine話：「其實我哋喺車度都有戴口罩，但係因為化妝，所以先除低，一陣間我哋會戴番。」而新城噚日搞咗個「新一代齊齊戴口罩呼籲行動」，叫一班新晉歌手教人戴口罩，點知王秀琳、E-kids都戴錯晒，佢哋真係要好好學點樣用口罩。

仔仔歌迷幫偶像行善
台灣F4成員仔仔周渝民將會喺六月九日過二十二歲生日，佢個國際歌迷會「渝民小鎮」𠵱家就幫佢諗定慶祝活動，佢哋有見呢排美伊開戰，波及好多無辜百姓，就發起「仔仔生日捐款活動」，叫歌迷唔使花錢買禮物畀仔仔，呼籲全球嘅歌迷可以用周渝民名義，捐錢畀無國界醫生，等佢哋有足夠經費向戰爭災區難民提供醫療服務。仔仔生日當日，「渝民小鎮」重會登報紙祝賀同呼籲捐款。

鄭敬基擔心加國兒女
鄭敬基噚日為商台節目做嘉賓主持，佢為防非典型肺炎，唔單止喺做節目時全程戴上口罩，重隨身帶咗一支消毒洗手液㖭，但佢話如果商台可以勤啲換咪就最好。鄭敬基嘅仔女現居於多倫多，佢話都有叫仔女小心啲，因為𠵱家喺嗰邊都已經死咗幾個人，但鄭敬基暫時未有打算到多倫多探佢哋，希望等件事明朗啲先再作打算。