名模Rosemary、周汶錡及歐陽妙芝等昨日在灣仔會展演出婚紗show，剛自北京返港的Rosemary表示，北京市民對非典型肺炎毫不戒備，她與同行的模特兒戴口罩反被取笑。她又表示體質較她差的母親堅持陪她北上，令她十分感動。
名模周汶錡、歐陽妙芝、姚嘉妮及Rosemary，昨日在灣仔會展為婚紗店包括新天地、蒙娜麗莎及羅浮宮行婚紗show。在非典型肺炎陰霾下，昨日入場的觀眾大多戴上口罩。
Rosemary表示剛自北京演出完由貿易發展局舉辦的fashionshow回來，並一落機即與同行的母親往醫院做身體檢查，她說：「𠵱家非典型肺炎蔓延得咁快，真係好得人驚。不過我覺得北京市民似乎對呢個病毫無恐慌，我同埋一齊行show嘅模特兒好似LisaS.咁喺北京去街時都戴住口罩，點知俾當地人笑我哋㖭。」
Rosemary續說：「呢個trip我真係要多謝媽咪，因為自從我獨立之後，好多trip都係自己出發，但係媽咪因為唔放心我，陪埋我上北京。媽咪嘅體質一向冇我咁好，免疫力亦比我弱，但係佢都堅持陪埋我去，真係好感動。𠵱家我一日幾餐都喺屋企食，冇事都唔敢出街。」
Rosemary男友Gordan每周均要往ClubIng打碟，問她會否擔心場內人多，Gordan有被感染的危機？她說：「驚都冇辦法啦，但係Gordan打碟嘅地方係自成一國嘅，同人群都有距離。」
問Rosemary會否因非典型肺炎而與Gordan減少親密接觸如接吻？她說：「我會令自己忙啲，唔諗呢啲嘢。」
昨日所見按照營養師吩咐進食健康餐單及勤做運動的Rosemary纖瘦不少，她笑說：「係呀，我𠵱家條腰得番二十五吋，希望再瘦一吋就好啦。」
採訪：JessicaNgan
攝影：HoKwokHo
