講到最地道香港飲食文化，當然係港式絲襪奶茶啦！最近小記行開深水埗區聽到有街坊報料，佢哋話如果想喺深水埗飲到最傳統嘅港式絲襪奶茶，一定係桂林街嘅新香園。
聽佢現任老闆周生講，佢哋爺孫三代40幾年都係喺深水埗做茶檔，由以前街邊檔做到今日地舖，沖奶茶手法都係咁一代傳一代。呢度嘅奶茶（$8）跟足傳統西茶撈中茶葉配方，絲襪奶茶都有幾十年歷史，你話有乜辦法唔好飲！另外，呢度嘅蛋牛三文治（$10）同區至出名，逢周六、日都好多時有人排晒隊嚟買，事關佢哋係用即「拂」鮮蛋加鮮牛肉來炒，食三文治都可以食到鑊氣，佢係得嘅！
記者、攝影：朱崇德
新香園
地址：深水埗桂林街38A號地下 電話：23862748