星期四在大道中馬莎門口，一對衣着光鮮入時嘅老夫老妻手拖手行街，左丁山聽到位女士話：「唉，香港點會搞成今日咁嘅田地。」唔使問阿桂，呢對夫婦喺香港享受過美好時光，為今日社會紛亂情況，搖頭歎息也。
為咗財赤、失業、負資產而彷徨，只係物質上嘅，到如今，全港市民為咗一個怪病而驚恐，關乎肉體精神，重更攞命。「沙士」殺死咗餐飲業一半生意真係越窮越見鬼，餐廳羅心都實晒，惟有上網睇笑話，以求輕鬆。星期四下午，佢電郵傳來一版西洋男女笑話，一半以上不宜觀看（雖然成年男女覺得好好笑），姑且抄番幾條，睇吓大家笑唔笑。
（一）女朋友與老婆有何差異？答：相差四十五磅。
（二）男朋友與老公有何分別？答：分別係四十五分鐘。
（三）有幾多男人會換燈膽？答：冇、男人只會在黑暗中靜坐兼大聲埋怨（按：拮中左丁山要害）
（四）點解女人咁難搵到一個夠體貼，肯關心而又好樣嘅男人？答：因為呢類男人有晒男朋友。
（五）新老公與養隻新狗有何分別？答：一年後隻狗見到你仍然好興奮。
（六）犯了重婚罪，有何懲罰？答：有兩個外母。
餐廳羅又電傳半打圖片（電腦改造過）嚟，其中一張係布殊個頭纏上白頭巾，留咗白鬚，標題就係：假如美國打輸咗！美國人睇咗就未必覺得好笑咯。今日環境咁悶，希望大家笑多啲，保持身體健康。