計番條數，有奧雲、碧咸等球星坐鎮嘅英格蘭國家隊都已經兩年幾無出過新波衫，但為咗迎接04年歐洲國家盃，Umbro終於出招，而且一出就係絕招──雙面設計，一面落場一面玩Fashion，重有齊長短袖，聽日全港公開發售，準備搶番件啦！
白底襯紅邊，加上隊章喺正心口，一睇就知係英格蘭，留意衫身袖口嗰粒金星，要攞過世界盃先有（英格蘭喺1966年攞過世界盃冠軍）。雖然呢件唔係落場版，但款式設計會同球員落場比賽嗰件一樣，而原裝熨字亦會同日到港，想做碧咸定奧雲自己決定。長袖版本基本上同短袖款無分別，只係加長咗兩隻袖。
入貨點：自由球
地址：旺角西洋菜街南2A銀城廣場903室
電話：21714228
用嚟裝飾嘅假魚缸，之前都見過唔少，但都係靠水流將缸裏面啲膠魚仔推嚟推去，都幾兒戲。相比之下，呢個日本出品的高科技機械魚連魚缸就巴閉好多，機械魚唔使用電都可以喺缸內游來游去，動作自然，非常真實，皆因機械魚用咗一種名叫人工筋肉嘅物料，配合由魚缸底部升上來嘅水泡產生出電離子，令尾鰭產生動力，使機械魚在缸內暢泳。另外缸內的4色液晶發光燈，同樣係靠水中電離子發光，毋須接駁電源。不過，缸底產生水泡的水泵仍要靠電力推動，即係始終都走唔甩，一樣要插電掣。
入貨點：JCSHOP
地址：銅鑼灣時代廣場8樓833號舖
電話：31022783
記者、攝影：馬慶武