上個星期五睇完港股嘅走勢，覺得恒指無論短線、中線及長線嘅走勢均偏淡，但美股上個禮拜五並無出現預期中急跌，杜指只係下跌55點，收8145。
技術上，美股未確認轉壞，但形態上杜指有機會營造塔形頂，就時時刻刻提醒趙飛雲要小心。美軍話要同伊拉克打持久戰後，過去兩日股市反應唔算激烈，同時亦下跌得十分有秩序，唔知係大戶轉唔到身，定係又有無形之手干預？
滙豐（005）落實收購HouseholdInternational（HI），究竟係壞事抑或好事暫時好難估，但美國近年大城市如紐約等樓價大幅飆升，97年至今部份房屋價格升1-2倍，話冇泡沫成份好難令人信。如果美國經濟大幅轉差，或出現滯漲（Stagflation），息口調頭向上，HI難免受影響而拖累滙豐。
短期而言，滙豐股價較受供求影響，滙豐收購HI以新股支付，若股價不變，滙豐市值將增大約15%，指數基金如盈富（2800）等須調整組合內比重，增持滙豐減持其他藍籌，這對滙豐股價有利。
另方面，滙豐收購HI後，HI將被踢出S&P500指數，基金作出調整，滙豐可能惹來沽壓，孰重孰輕將成股價表現關鍵，趙飛雲意見是滙豐暫不宜沾手，滙豐輪更要避開。
肺炎在港肆虐唔夠1個月，已有銀行調低今年香港經濟預測半個百分點，但影響暫時唔算太大，最緊要盡快掃除疫症，否則財神只會過門而不入。
趙飛雲