一個非典型肺炎令全城掀起口罩搶購潮，人人都靠口罩自保，今日就帶大家去街頭睇吓口罩熱潮下的眾生相。我一直以為布口罩只是扮型的裝飾品，但原來只要佩戴正確，一樣有防禦的作用。不過這類口罩如果不是每日清洗的話，隨時會引菌入口，想知道點樣處理先至啱，就聽聽醫生有何專業意見！
記者：黃婉冰 攝影：區佩嫦
資料提供：方玉輝醫生、家庭醫生關嘉美
逢星期一至四刊出
「呢個口罩喺台灣買嚟坐電單車用，都幾好用㗎，可以起到阻擋作用，但就比較焗，我會每日用洗衣液洗番乾淨再用。」
「我以前試過戴紙口罩，但貼住塊面好唔舒服，呢個口罩唔錯，戴上後唔會好焗，我戴一個鐘就會除一除，唔用就摺埋放入袋，每日用完都會用肥皂洗番乾淨。」
「我覺得紙口罩作用唔大，又要日日丟棄，呢個韓國買嘅滑雪面罩可以洗嘛，又型又可以做到預防作用！」
黃先生喺袋內隨手拿出一個喺日本買嘅口罩，佢話呢個口罩備有消毒成份，預防工夫真係做到足！
布口罩要日日洗
其實布口罩就好似內衣褲一樣，必須要每日清洗，而清洗時最好用洗衣液或皂液，用手清洗就可以，毋須特別另加任何消毒劑或漂白水。
「我一出街就會戴口罩，不過我嫌N95太焗，所以我會戴質地較薄嘅紙口罩，口罩上面畫公仔，無咁寡，又夠得意，每次我畫嘅公仔都唔同㗎！」
畫公仔無減功能
即使在口罩上畫公仔或者貼上貼紙，只要範圍不大，其實對口罩本身嘅作用都唔會造成影響。
「出街或者搭車都會戴呢個N95，雖然不至於搞到皮膚好痕或者唔舒服，但就好焗，所以一返到屋企或者公司就會除低唞唞氣。」
「我以前戴過噴油用嗰啲，密封程度無咁高，呢款唔錯，我測試過周圍唔會有氣走出嚟，密封度好夠，而且有活塞無咁焗，我通常返到屋企就用袋入住第二日用過，平均兩日先換一個。」
戴布口罩已足夠
市面嘅工業用N95口罩質地較密，可以防塵、防微粒，所以好似有肺氣腫、慢性氣管病、哮喘的人士都不適合佩戴。其實一般情況下，戴布口罩或外科用口罩已足夠，去醫院呢啲高危地方先要用到N95，如果戴時覺得呼吸困難就要即刻除低。
「我好鍾意呢個粉紅色嘅口罩，我覺得好靚，戴起嚟好舒服。媽咪叫我唔好成日除，所以我出街都會戴住。」
小朋友最好戴自製口罩
要幫小朋友揀選合適嘅口罩，最好用棉布幫佢哋自製，怕薄可以做多幾層，最緊要係照住佢哋個面形嚟裁剪，確保能掩護住鼻孔和下巴部份就得，愈貼面就愈好。
1.由於這種非典型肺炎菌可在空氣中生存達三至六小時，手部好有機會沾上細菌，所以戴口罩後最好不要用手經常觸摸，同時亦要避免用手直接觸摸鼻、口或眼。
2.棄置口罩時，應用膠袋或紙巾先包裹好再放入垃圾桶內，避免細菌四散。
3.每次所戴口罩數量不要過多，戴一個已可達到基本功能，若然戴多一個或以上，有機會造成窒息。
4.當口罩一出現污糟或濕嘅情形時，應盡快更換一個新口罩，而一般口罩不能戴超過一日時間。