近排好多工業股，股價一直企在高位，莫非芬佬真係冇嘢好買？例如創科實業（669），無視股價累積升幅大，以及外圍走勢偏軟，確係升到你唔信。好似上周五咁，創科又升多4.7%，收8.90元。經紀黃仍然睇得好樂觀，認為隻股高處未算高。
佢同小初講，創科雖然股價升得多，但公司將於4月中公布業績，大部份外資大行估佢盈利會增長40%樓上，所以創科現價雖然唔平，但喺好多芬佬心目中，仍然係一隻好股。
經紀黃話坊間重有一個陰謀論，就係創科舊年年底，斥巨資收購美國電器製造商Royal，交易估計亦會在4月完成，所以唔排除會順便搞埋批股集資，呢個可能亦係令創科股價企硬嘅原因之一。
另外，超級冷門股四海國際（120）同埋另一隻冷門投資股金源創業（310）一齊停牌，原因係搞換股行動，因乜事兩者會搞上關係，真係值得研究吓。
慕容小初