一連三日嘅七人欖球賽引人入勝之處，就係佢哋賽事一日比一日精采，球迷一日比一日瘋狂。噚日最後戰役，女球迷已經由之前窄身小背心變為迷人三點式；小情侶亦由之前手拖手，到賽事尾聲變為熱情擁吻。
為增加今年國際七人欖球賽嘅氣氛，大會噚日除咗同以往一樣舞龍醒獅助興外，喺比賽結束後重加插一幕煙花滙演。原本英格蘭捧盃，場內大部份嘅英國球迷已陷入瘋狂，𠵱家重有煙花睇，興奮情緒簡直爆晒燈，主辦單位今次構思真係抵讚。
經濟不景，今年好少球迷肯畀一百元幫襯大銀幕發表自己嘅「愛的宣言」，尤其賽事頭兩日，十隻手指數得晒。好彩噚日嘅球迷入場人數回升，每場比賽間都有不少呢類廣告，不過內容多數圍繞母親節、生日快樂等題目，反而熱門話題美伊大戰、非典型肺炎就冇人想提。