魯振順噚日凌晨揸車途經清水灣影業路時俾警察截停話佢衝紅燈。自稱以往連一分都冇俾人扣過嘅魯振順，最近忙緊拍電視劇《西關大少》，佢噚日凌晨兩點半收工揸車離開將軍澳電視城返西貢嘅屋企時，駛到科技大學外嘅迴旋處突然俾警車追截，嗰位交通警員指魯振順衝紅燈，準備發告票，罰佢四百五十蚊同扣佢三分。
不過，魯振順就話當時係綠燈，根本冇衝燈，佢重話個交通警好冇禮貌，所以唔肯收告票，重報警投訴個警員。佢呢輪有啲咳同感冒，所以當時佢都戴咗口罩，重加多張紙巾掩嘴，佢好勞氣咁話：「收咗工攰到死，重搞埋啲咁嘅嘢！」警員搞咗半粒鐘佢都唔肯接告票，最後惟有將告票郵寄畀佢。
林嘉欣噚日喺柴灣為護膚品Regene拍廣告，收十萬蚊酬勞。原來佢一個月內接咗四個廣告，又話自己係白老鼠，佢話：「我每次都一定會親自試過啲產品，先幫佢哋拍廣告。」此外，憑電影《男人四十》攞金紫荊「最佳女配角」嘅嘉欣話：「我今次記得多謝屋企人。」而下周日舉行嘅金像獎頒獎禮，嘉欣話會以平常心應戰。
郭晉安日前喺順德拍咗個樓盤廣告，大約有七位數字嘅酬金。安仔話：「廣告要我騷胸肌，好彩我平時都有做運動。我𠵱家儲緊錢，諗住喺港島區買一間無敵海景嘅單位。」安仔拍完廣告之後，佢同工作人員都咳，大家懷疑患咗非典型肺炎，結果只係虛驚一場。
組合Boy'Z噚日去到旺角NewayCity拍攝一啲有關卡拉OK消毒程序嘅短片，Kenny話佢屋企人每日都會煲防肺炎涼茶同埋用消毒藥水抹屋。而Steven就叫媽咪留喺荷蘭唔好返香港，佢哋重呼籲歌迷要戴口罩。另外，佢哋本來要去港台錄廣播劇，但𠵱家就決定延期。至於Neway嘅負責人Grace就否認網上流傳有非典型肺炎嘅患者曾去旺角NewayCity呢個傳言，而且佢哋亦推出優惠吸引人客。
組合Twins噚日喺內地返嚟香港，蔡卓妍（阿Sa）同鍾欣桐（阿嬌）出現機場，阿嬌因為有啲作感冒，所以戴住口罩出閘，但阿Sa就冇戴口罩出嚟，佢話：「我本來有戴，但有啲呼吸困難，就除咗囉。」上星期三有乘客由北京坐港龍班機返港證實患咗非典型肺炎，Twins噚日都好緊張自己有冇搭嗰班機。
江華噚日喺屯門出席簽唱會，江華遲到兼冇戴口罩，佢話：「我覺得冇需要戴，歌迷都係想見我，戴口罩佢哋會失望，同埋我唔介意同佢哋握手。」
噚日現場得二、三十個fans，部份冇戴口罩嘅fans，主辦單位就派口罩畀佢哋。噚日江華經理人兼太太麥潔文冇同江華一齊出席活動，江華話：「因為太太病咗，兩個小朋友都病埋，不過好彩太太係感冒菌入腸。」
