飲食人誌：
蘭桂坊鬍鬚佬　創春日法花宴

如果你同小記一樣都喜歡行街擔天望地的話，相信都會發覺路邊嘅紅棉花都已經開晒，縱使有幾多壞消息，香港嘅春天都已經到臨！其實花除咗觀賞之外，放入食譜都一樣饒有趣味，如金庸筆下嘅香香公主，都係因以花為食，從體內散發出陣陣幽香。最近中環蘭桂坊CAFEdesArtistes法國餐廳，都出咗個原創法式花香大餐，由頭盤食到最後一道甜品，都係「以花食為食」，話唔定食完會好似香香公主一樣，迷死隔籬！

記者：朱崇德　
攝影：楊錦文

不論中菜或西菜，間唔中會有啲菜式加入「花」作煮餸材料，不過蘭桂坊其中一間食店最近就非常創新地起用了一個全以花為主題的WorldPeaceMenu（SayitwithFlowers）全花宴法式菜譜。

以花菜勸喻美伊停戰
貌似曼聯巴夫斯嘅行政總廚Jean-PierreBagnato表示：「以全花為題材作法國菜，的確非常創新，另外我重想以花作籲，勸告美伊雙方嘅領導人，連花都可以用嚟做餸菜，世間上重有邊啲事冇可能發生？如果兩位領導人可以以花做餸菜嘅開放思想，世界就唔會被彼此嘅成見所左右而引發戰爭！」果然高見！

碟上花紋親自繪製
初度接觸Jean，他予人一種極端嘅雙重性格。與人交談時感覺好隨和，動作說話重帶點逗人的滑稽；但一講到老本行嘅法國菜，就馬上轉為藝術家嘅執着，就以平平無奇的餐碟為例，為咗配襯每一道菜式以最美一面示人，原來所有上菜碟的精美圖案，都是Jean即席以植物天然顏料畫上的，說他是一名法菜廚師加藝術家，亦絕不為過。
這個WorldPeaceMenu，可以分作午餐及晚餐；晚餐可以一次品嘗晒五個以花為題材的特色菜式（$425），至於午餐方面，收費會較平（$250），不過就會少了法式百合花配芹菜頭凍湯及凝糖玫瑰雪糕，所以食法真係豐儉由人。

紫羅蘭香煎法國鴨胸
紫色太陽花原來係甜薯
Jean幾句： 「喺祖家時，我一有時間就最鍾意買一小束紫羅蘭畀我太太！以法國人嘅「花文化」，紫羅蘭係代表浪漫咁解嘛！

記者試食： 唔好以為頂上一朵大大的紫色太陽花係裝飾品，其實佢係以法國獨有的紫色甜薯，細切薄片所砌出來，鴨胸是以法國最傳統的橙汁煮法，配以黑菌、鴨肝、西芹及檸檬作醬汁，入口感覺酸酸溜溜，又帶紫羅蘭陣陣清幽之花香，至於鴨肝黑菌汁又能提升鴨的鮮味，好有法國特色。

凝糖玫瑰雪糕
Jean追女必殺菜式
Jean幾句： 我追老婆時都為佢買過唔少束玫瑰，如果早啲創製呢道菜式，相信會為佢慳番唔少時間；如果你都係蜜運中嘅男女，帶佢嚟食呢道菜，或者可以好快得米！……其實我試過用紅、粉紅同白玫瑰花瓣做呢道手製雪糕，最後都係發現用新鮮紅玫瑰做，花味最香。

記者試食： 食法原來好特別，先取下少少玫瑰雪糕，然後放在以新鮮玫瑰花瓣、蛋白及糖霜所製的拌菜內一齊食用；入口時玫瑰雪糕及糖霜在口內溶化，最後餘下的蛋白及玫瑰花瓣停留在口裏，滲出陣陣幽香，真係幾有香香公主食花Feel。

薰衣草焦糖燉蛋
表層香滑花籽甘香
Jean幾句： 法式燉蛋一向係法國菜中最出名嘅甜品，不過今次最特別嘅係加咗薰衣草嘅花香味，其實法國南部有一個奇景，每逢薰衣草盛開嘅季節，南部好多地方就會有一望無際嘅薰衣草花海，配以藍藍嘅海邊景致，所以法國南部有BigBlue嘅美譽！

記者試食： 呢道焦糖燉蛋好滑，面頭灑上一層薄薄的焦糖，不過最正的是加入矜貴的薰衣草花籽，感覺更甘香，特別由法國訂回來，平均來貨價每千克$700，未見過香港有得賣，絕對是地道法式風味！

CAFEdesArtistes
地址：中環德己立街30-32號加州大廈閣樓
電話：25263880

鳴謝：李永記花店
地址：香港中環蘭桂坊4號
電話：25235913