講到近日的排隊熱賣，肯定非口罩莫屬，而地鐵也在這個滿街「蛇餅」的日子推出HelloKitty紀念票，這卡通人物的產品，向來是排隊焦點。今次又能否與口罩「爭輝」呢？我就專程一早去到某幾個較旺的地鐵站睇睇，結果發現，雖然人龍欠奉，但上午9:00，觀塘站已經售罄，確實非常搶手，原來病毒襲港，一樣沒有減低Fans對Kitty的熱情。
記者：招佩珊 攝影：陳智良、林栢鈞
今次地鐵推出的Kitty公仔連車票，一套三款，造型相當可愛，雖然香港近日不利消息頻傳，以致無甚聲勢，但事前我走訪過幾位Fans，都鐵定要得到這心頭好，而且早有策略，有的搭朋友購買，有的一心以早制勝，且看看情況是否如她們所料。
荃灣地鐵站詢問處，不見人龍，觀察了15分鐘，最多人的時候都只不過得四、五個，但個個都會買番一、兩套，有的買完就轉頭走而無搭地鐵，是專程一早到來買Kitty的，絕對是捧場客！
我去到人流應該會較多的太子站，以為會有較多人排隊，誰知出乎意料，不但唔見有人龍，直頭無人排隊，我等了10分鐘才至見有個伯伯買了一套，見他邊行研究個盒，怕且都是買給孫仔玩！
直踩到觀塘站，終於畀我見到人龍，在我觀察的約一個小時內，一直都保持五、六人排隊，最高峯的時候更有十幾個人排隊，捉住人龍裏面最搶鏡的女孩，她剛剛買到心頭好，掩飾不住興奮。原來這個叫Winky的Kitty迷，這天不用上班，早就下定決心要一早起來買這套車票，絕對是忠實Fans。
幸好Winky來得早，皆因到了9點，觀塘站的Kitty紀念精品已經售光。我即時向客務中心的職員查詢，原來這個時候，就只剩港島線的筲箕灣及杏花邨等兩、三個站還有小量存貨，數萬套的紀念車票，一個早上已經所餘無幾！
就這個換購首日的情況所見，這些卡通人物產品的號召力已經大不如前，受追捧程度遠不及近日熱賣的口罩，但是一樣不乏擁躉捧場，要買得心頭好，雖已不必捱更抵夜爭崩頭，但還是要早！
立即再調查一下先前訪問過的FansCarol及Winnie。結果託地鐵優惠會會員的朋友優先認購的Carol當然十拿九穩，而另一FansWinnie亦於8:00am成功購得心頭好，顯示今次的產品，不難到手。
以前每次推出這類卡通人物產品都要排餐死才可到手，很大程度是因為炒得起，花點時間隨時都可以換來很大收益，今次這套Kitty紀念票到手不難，但還有沒有勁炒機會？就等業內人士分析一下。
經營懷舊玩具及流行精品專門店10年的老闆James話，玩具有無炒價視乎推出的數量及可玩性，像上次地鐵推出以Sanrio卡通人物做主題的Q版地鐵列車，他認為因為1套列車有齊4個不同卡通主角，4卡車相連，焗住要儲齊4卡車先可以串成列車，所以需求大，當時可以炒到成二百幾蚊1套。
今次呢套得一個主角，而且HelloKitty的產品實在太多，吸引較低，未必會炒得高。
James估計呢次所出的紀念車票加玩具應該可以炒高一倍價錢，每套可炒到$160，至於個炒賣價重有無得高，要視乎數量，推出數量愈少，炒價可以高些少。
排隊換公仔，曾幾何時，是城中盛事，而且件件炒得火熱，如今經典難再出現，行內人士亦指出，這些精品，今時今日，亦再沒有炒賣市場。
「史諾比世界之旅」連續28日推出合共28款，要食1款套餐才換到1款，我都食足28日才換齊成套，諗番起都怕怕，家陣都少咗食套餐！
威水史：一隻$28
終於唔使捱套餐，買任何食品加$18可以換一隻，但經理制服那一款當時炒到$150都有人肯買。
威水史：$150隻都有人買
最後換購的一卡列車是大口仔電動火車頭，亦是最值錢的一卡列車，之前所換的3卡車都要靠它拉動，玩具店老闆James話當時單是呢卡車都可炒到百幾蚊。
威水史：火車頭百幾蚊