韋利嘅梅開二度令意大利喺歐洲國家盃外圍賽輕取芬蘭，而且重話搵到個贏波form，當然值得為佢哋嘅擁躉高興，但各位有冇諗過，如果先前意大利生性啲唔失分，就唔會搞到威爾斯坐大。
意大利贏芬蘭之前對住塞爾維亞和黑山，以及威爾斯合共得一分，搞到畀英格蘭猛將密布嘅威爾斯拋離成七分，真係養虎為患；就算意大利真係喺九月主場搞掂威爾斯，將仍會好大機會繼續落後，呢啲都係發力太遲嘅惡果，所以意大利教頭柏東尼賽後話托迪同韋利進攻組合零舍唔同，但係咁又點啫？
我求大俠諗𠵱家意大利都好被動，因為塞爾維亞和黑山只落後佢哋兩分同少打一場，隨時過埋意大利，所以藍衣軍真係要自強！
如果速龍今朝對紐約人場波輸埋嘅話，教練韋健士將同前快艇教練費治齊名，成為NBA史上輸波最多嘅教頭（一千一百○六場），最諷刺嘅係韋健士同時亦係NBA史上贏波最多嘅教練（一千二百九十場），真是「成也蕭何，敗也蕭何！」由於速龍今季表現衰到震，睇嚟韋健士喺速龍嘅時日無多，今季打完後多數烏紗不保！
奧尼爾對帝王時射入兩萬分個籃球俾人寫上粗口件事終於水落石出，原來係兩個坐喺球場邊嘅帝王球迷，喺第四節暫停時，趁球證同工作人員唔為意，喺個波上面寫咗「奧尼爾係笨蛋」（Shaqisanasshole）嘅粗口。不過最奇怪嘅係，當時球場上十三對眼（三個球證同十個球員），竟然冇一個人發覺個波俾人塗鴉？證明班球員打波時真係好鬼專心。
梳打埠開中國甲A聯賽嘅亞洲盤，搞到中國足協好不滿，成日想喊停，我求大俠都覺得有道理，因為好似星期日嗰兩場波大連對遼寧同埋雲南對深圳咁，佢哋嘅盤口可以喺開波前三個半鐘內波動四級咁多（由平/半至一球），但又冇路捉，消息滿天飛，古靈精怪！不過，據聞國內嘅朋友就好捧場喇。
愛爾蘭作客格魯吉亞本來係一場幾弱嘅戲碼，但係主隊球迷就唔係人咁品，成場向愛爾蘭球員掟嘢，最離譜係有把彈弓刀掟中基爾賓尼手臂，嚇到佢標一身冷汗。另外重有啲工業用啤呤擊中比連，而奧沙亦差啲中招，此外重有玻璃樽同膠樽……總之我求大俠話如果有收買佬在場，一定滿載而歸，而難為嘅係嗰班出生入死嘅球員。