南豐麥一擎噚日非常風騷，雖然戴住口罩，亦睇得出佢笑口騎騎個樣，皆因滿意將軍澳廣場銷情之故，兩大代理行亦做足工夫，最重本莫過於美記，訂咗個超巨型疍糕，糕面寫住祝賀將軍澳廣場成功售出半數。兩間代理行區頭又同麥一擎排排企開香檳，最重要嘅一步，就係拉橫額影相，首先見到美記大獲全勝銷售冠軍字眼，跟住係中記嘅全行總冠軍標語，咁多冠軍，證明個市重有得玩。
講到有關非典型肺炎嘅問題，麥一擎話公司買咗兩萬個口罩派畀員工，重推介話佢哋買嗰款好用啲同通風啲，唔會太焗咁話，至於價錢，市面上一般嘅口罩都要三、四蚊個，但係麥一擎話佢哋嗰啲就好平，皆因係大批訂購有折扣，每個一蚊。有關售樓處方面嘅防肺炎措施，所有員工要戴口罩及手套工作，同時特別加強衞生清潔，等大家安心。
各大發展商喺非典型肺炎陰影下，照常賣樓，不過亦做足預防措施，好多發展商都準備口罩派畀睇樓客。長實就更加有誠意，由執行董事趙國雄示範戴口罩嘅方式，重戴埋招牌黑超，副尊容都遮咗八成，幪面超人咁款，睇怕出街都無乜人認得。佢加多句話：「好似我出名貪靚嘅都戴口罩，可以做個好榜樣。」又特別提醒在場記者，除咗記得戴口罩之外，重要用番梘洗手。
剛由新加坡返港嘅趙國雄話，當地人對於呢個病嘅關心程度較香港高，嗰邊市面真係好靜，好多零售活動都停咗，唔似得香港，假期商場都重有咁多人逛街。
非典型肺炎散播途徑未完全查明，人人為求自保，都戴口罩出街，甚至唔出街。發展商如常開放示範單位，亦做足工夫防止病毒擴散，好似太古地產西灣河逸濤灣，啱啱搭建四個新嘅主題示範單位，周末首度開放，單位內窗戶全部打開，等空氣流通啲，屋苑護衞員都戴晒口罩同手套，至於買家當然已做足防備，可惜病毒嘅殺傷力實在太大，到場睇樓人士唔多，有參觀者同蘭西講，其實住喺樓下，得閒咪上嚟睇吓新示範單位囉！
近期非典型肺炎肆虐，搞到大家都唔敢出街消費，零售行業就叫苦連天，受影響最大係食肆。唔少商場人流疏落，租戶生意銳減，重拖累埋啲大業主㖭。
由於近年商場大業主招租時，開始興用底租加抽佣嚟定租金，即係話部份收入係收承租客一啲生意額，所以生意愈好，大業主就愈和味。近期租客生意大減，大業主收入相對萎縮，成為非典型肺炎嘅受害者。
高力國際今個禮拜五到日，喺香港舉行英國豪宅物業展銷會，推出坐落WorcesterPark的TheHamptons，單位面積由538到2820方呎，包括一廳兩房嘅分層單位，同埋四到六房嘅英式大屋，連車位售價17.5萬到75萬英鎊。物業預計今年秋季至明年春季落成入伙，估計租金回報率可達7厘。
高力國際董事林嘉恩話，物業設有私人公園，設施重有健身中心、宴會廳、商務中心同網球場等。
蘭西
電郵地址：
