麻煩嘅雨季又嚟,成日要攞住把遮都幾麻煩,「苦中作樂」惟有買把靚啲嘅遮;今季新款嘅卡通人物雨具啱啱到港,外形超級可愛,女仔、小朋友都啱用。睇過之後,雨天可能會變得令人期待。
記者:馬慶武 攝影:林佰鈞、伍慶良、馬慶武
Model:EstherfromSunspot、SweeneyfromSCOOP
小朋友專用嘅雨具,以雨褸最多花款,除咗有極鬆身通爽嘅斗篷形外,重有似便服多過似雨褸嘅花邊裙款,以後叫小朋友着雨褸,重使乜𠱁呀。
童裝遮每款都分為45cm及50cm長度,45cm嘅係手動,而50cm嘅可以㩒掣打開,較高大嘅小朋友都可以用。
嫌HelloKitty等公仔太女仔,新幹線藍色雨褸就啱晒喇,男仔着都唔怕俾同學仔笑,重可以摺埋放落背囊袋仔孭返學。
外形較傳統,但一啲都唔老套,前後都印有圖案,頂帽重有大大個Pooh頭,可愛程度爆晒燈。
粉紅色格仔花,心口同背部都有HelloKitty圖案,重送埋個靚靚袋仔,停雨時雨褸可以摺埋放入去。
領口、袋口及褸腳都有花邊,睇外形真係唔似一件雨褸,而且頂帽重可以除低,加上質料透氣力強,無落雨着出街一樣掂。
另一款斗篷形嘅雨褸,前後都印有唐老鴨BB圖案。
卡通雨具除咗小朋友必用外,重有超多女仔都係呢班卡通人物嘅忠實擁躉,大Size嘅遮亦適合成年人用,款式比起童裝一啲都唔差。
小肥肥一族首次攞正版權推出雨傘,姆明、哥妮、史力奇等同伴一次過登場,雨傘以雙層設計,除傘面有黑白圖案外,傘內更有彩色圖畫,咁落雨天嘅時候,雖然抬起頭睇唔到藍天白雲,但都有一班小肥肥一族陪住你。(查詢:21498632/4月頭於各大精品店有售)
老牌卡通人物Snoopy今年都有新款雨傘推出,極有漫畫Feel。
用閃令令嘅質料製造,最靚係雨傘內層嘅星空圖案,有夜光感覺,落雨都可以數星星。
縮骨遮細細把易收藏,最啱𠵱家成日陰陰天想落雨嘅天氣,放一把喺袋度,忽然落大雨都唔會變落湯雞。
全遮藍天白雲圖案,有啲紮染Feel,加上Monchichi公仔圖案,色彩鮮豔。
圖案採用閃銀顏料塗上,所以傘身上的米奇圖案全部都勁閃,連遮套都一樣。
第一次推出雨具的姆明都有推出縮骨遮,但就無長遮咁繽紛,只有唔同嘅黑白姆明圖案。(查詢:21498632/4月頭於各大精品店有售)
SanrioGiftGate
地址:沙田新城市廣場第3期3樓A325號舖/九龍塘又一城2樓L2至17號舖
電話:26093633/31051299
全線Trendyland
地址:尖沙嘴金馬倫道12號地下
電話:27398182