港股已連跌6日，3月期指又已結算，外圍如果冇太不利變化，港股再落嘅幅度相信唔大，恒指上次低位8757（𠵱家8863）估計可以一守。但非典型肺炎風暴若唔快快趣趣告一段落，則港經濟難免又受影響，港股又再多咗1項不利因素，跌多過升。窩輪市場愈來愈唔易玩，落場嘅話，只宜落怡情小注，而且盡量咪坐盤坐得太耐，鋪鋪清為上。
長實（001）上周跌2.5元，收44.60元，睇吓會否低試上次43.50元低位，見低位，博反彈，小注買Call輪9761。隻輪6月杪夠鐘，現價13.3仙，溢價12.8%，槓桿率33.5倍。記住，落場後只宜一兩日，因為隻輪溢價唔低，正股如果牛皮拖幾日，溢價縮，揸9671一樣輸得唔小。
中信泰富（267）派成績表同派大息後，股價企硬，近期Call輪9480已停止買賣，係咁先，9298雖然6月下旬至夠鐘，但亦1仙有賣冇買。9298行使價17.89元，正股現價16.25元，到隻輪到期之時，正股已然除息，唔升唔跌計得番14.55元，距離行使價17.89元好遠，隻輪生還機會幾等於零。其他遠期嘅中信Call輪，因正股高息關係，實際溢價亦好高，暫時博唔過。
章盛