各位喜愛高性能房車嘅車迷，你哋有福喇！點解咁講？因為以專門改裝德國平治汽車而聞名於世嘅Brabus，將會喺今年夏季以限量形式，推出加裝有bi-turbo引擎嘅EV12高性能豪華房車嘛！
曾於多個國際性車展展出嘅全新BrabusEV12高性能房車，雖仍屬概念型號，但一台與現有S600型號相同嘅引擎，經Brabus改裝及響bi-turbo輔助下，馬力輸出可高達640ps/5100rpm，而扭力輸出更提升至104.7kgm/1750rpm，輔以一套5前速自動波箱，性能表現絕對毋庸置疑；難怪此車0至100公里加速度僅為4.2秒，而極速更可高達340km/h咁快啦！除此之外，一套懸掛系統更會用上Brabus嘅跑車化製品，匹配四輪19吋高性能輪胎組合（前輪255/35ZR19，後輪285/30ZR19），可有助增強路面循迹性及操控表現；就連制動系統亦被作出適當改良，從而予人有收放自如嘅效果。車身亦加有全車包圍，令造型變得更具跑味之餘，就連車廂內部亦被稍作修飾，以達至有內外呼應嘅效果。未知身處香港嘅車迷，有否能與呢部BrabusEV12近距離接觸嘅機會呢？