非典型肺炎病菌橫行香港，搞到成個香港人心惶惶，唔單止食肆同娛樂場所受影響，就連手機場都比平時靜得多，以往黃昏時間例必人頭湧湧，早兩日羅新基落場就幾乎可以打橫行。老闆當然戴住個口罩喺度叫苦連天啦，「生意比平日少五成有多，希望病菌快啲走，生意自然有。」
SonyEricsson部T310話咁快就已經喺手機場有得賣，羅新基梗係第一時間就飛落場索吓料先，不過落到去睇見班老闆面色都估到個結果，雖然開價只係$1,580，不過返咗兩日貨都只係去咗幾部。睇見咁樣，都只有歎句生不逢時，喺呢個全城皆怕惹病嘅時候先出場，就梗係爭啲㗎啦。
講緊嘅熊貓同樣出產自中國，不過就此貓不同彼貓，係內地手機生產商熊貓手機，皆因佢部超型仔對摺機GM800水貨已經喺先達出現，係連來路機都少有嘅無天線設計，6萬5千色螢幕加上40和弦，睇到羅新基流晒口水，不過知道個價錢之後就要收番啲口水，皆因開價$4,580，都係眼看手勿動。
查詢：滙Phone電訊（23930789）
羅新基小時候睇卡通片，成日都好恨有部手表電話，今期終於都有着落，唔再只係得個想字，皆因SAMSUNG早前宣布會喺今年第四季推出其手表電話，淨係睇吓個Spec都已經引死人，256色彩芒、Class10GPRS、MMS、900/1800雙頻同WAP1.2，一隻手表就搞掂晒，睇嚟羅新基都係時候努力儲定錢，等佢一出就娶佢入我羅家門。
文：羅新基