汪明荃（阿姐）、陳松伶、林保怡、區瑞強、江華同張可頤等，前晚喺無綫電視城為節目《紅星追聲名歌SING》拜神同錄影。
近排非典型肺炎肆虐，松松前晚就戴咗HelloKitty口罩，非常可愛，佢話：「呢個口罩係喺日本買嘅。」松松重作狀錫阿姐㖭。當一班藝員切燒豬時，松松又突然幫燒豬戴口罩，佢話：「我幫隻燒豬戴咗口罩，阿姐可以去切燒豬啦。」
無綫前日宣布喺下月底前所有節目都會取消招待現場觀眾，而前晚嘅《紅星追聲名歌SING》亦唔例外，阿姐面對一排排空櫈，仍落力演出。阿姐話：「呢個氣氛好特別，冇現場觀眾，二十年都未試過呢種情況。不過我係專業人士，我識搞到啲氣氛好興奮。」對於預防肺炎，阿姐話會做好家居消毒，戴口罩同勤洗手。
文頌嫻噚日去銅鑼灣做化妝示範模特兒，雖然近日非典型肺炎橫行，但文頌嫻就甘願為五位數字酬勞而冒險，佢話：「我頭先都有戴口罩㗎，不過因為要化妝，先至冇辦法咋，做我哋呢行係靠臉口搵食，所以都幾難避免，好彩𠵱家我唔使拍戲，如果唔係拍親嘴戲都要暫時封嘴。」
美國著名音樂人Moby因香港有多宗非典型肺炎，所以取消下星期四喺灣仔會展舉行嘅音樂會，買咗飛嘅樂迷可以透過快達票（HKTicketing），喺下個月三號至十七號期間辦理退票手續，而有關退票情況可以喺下個月三號起，打電話去31288288，或者係瀏覽快達票嘅網頁
有「雨后」之稱嘅蕭亞軒噚晚喺台北舉行戶外演唱會，唔知點解蕭亞軒每次開親演唱會都會落雨。而噚晚嘅演唱會開始前，蕭亞軒除咗冒雨綵排外，歌迷重摺咗紙烏龜，祈求天公造美，果然如願。蔡依林就擔任演唱會嘅特別嘉賓，合唱BritneySpears嘅歌㖭。
陳芷菁同名廚甄文達（左）噚日喺尖沙嘴出席活動，陳芷菁即場跟甄文達學煮蒸水蛋。對於非典型肺炎肆虐，陳芷菁話：「我覺得要增強抵抗力，我每餐會食兩碗飯，𠵱家要命唔要靚，我食多咗嘢，上圍重大咗。」
