大家唔好以為青年軍賽事就冇料到，好似前晚葡萄牙迎戰英格蘭嘅二十一歲以下歐洲國家盃外圍賽，就精采非常，結果葡萄牙以四比二勝出。不過，有入場觀戰嘅紐卡素領隊卜比笠臣，賽後就牙痛咁聲，事關紐記兩大新星維亞拿同埋阿美奧比都喺呢場波出事。
葡萄牙左中場維亞拿再次左邊膊頭甩骱，要提早收「咧」，而英格蘭前鋒阿美奧比雖然入咗兩球，但就喺八十三分鐘「兩黃一紅」。卜比笠臣賽後講：「我實在太嬲喇！維亞拿喺比賽時甩骱，佢哋托番正之後又畀佢繼續打，結果我到更衣室搵佢時，佢個膊頭又再甩骱，如果證實係慣性甩骱，就要做手術，今季都唔使預佢。阿美奧比無端端被罰出場，對佢嘅打擊都唔小。」
又唔怪得卜比笠臣嬲嘅，因為紐記𠵱家正全力爭下屆歐冠盃參賽權，佢梗係唔想麾下球員有乜嘢冬瓜豆腐啦！
英超聯球會富咸近排內部問題多多，繼佢哋領隊泰簡拿唔獲會方續約之後，班主阿法耶茲亦因為攞唔到英國公民嘅身份，決定由英格蘭搬去瑞士住。雖然富咸差唔多可以宣布護級成功，但係佢哋內部𠵱家搞到立立亂，我求大俠真係擔心佢哋喺下屆唔知會變成點，話唔埋會打回原形，降返落英甲聯比賽都唔定。
乜嘢叫「江山易改，品性難移」，巴西前鋒艾蒙度就係人辦。外號「野獸」嘅佢一向麻煩多多，今次加盟日本職業足球隊浦和紅鑽唔夠三個月，只係上陣咗兩次，就同紅鑽領隊奧夫特講話唔想留隊，咁就走咗去。睇嚟艾蒙度如果唔改變性格嘅話，要搵班落都幾難。
原本有沙里咸美錫、波勒、謝利美斯、夏格維斯同戴斯拿要養傷嘅拜仁慕尼黑，最近又增添咗前鋒薛基拿呢個傷兵，聽講重要唞成八個禮拜咁多。好彩拜仁𠵱家喺德甲聯領前第二位嘅多蒙特十五分咁多，就算得番半隊人，影響都唔會好大。
喺舊年世界盃打得好好嘅土耳其龍門魯斯度，季初開始話想去英超聯踢波，但係就一路都冇球會吼。我求大俠記得佢原本值成五百萬鎊，不過因為冇球會吼，身價就一路咁跌。聽講佢季尾會恢復自由身，如果佢人工唔係太貴，阿仙奴可能會諗諗，但係想踢曼聯就「敏」啲啦。
三十六歲嘅添夏達威喺第一場加盟溜馬嘅比賽即幫球隊大炒公牛贏波，呢位老將喺上季受傷甚少亮相，今季更加無人吼，今次難得有機會證明自己寶刀未老，當然搏老命打，全場攞咗十四分、七次助攻、四個籃板同三個偷球，果然係薑愈老愈辣。