早前小記與朋友路過尖東，朋友突然大叫：「好靚呀……部車！」，跟住小記就隨着佢視線嘅方向望去，原來好靚嘅車係指光岡（Mitsuoka）Galue1，朋友重話如果有錢，都會買番部做座駕咁話，事關揸出街一定惹來不少豔羨目光嘛！而我哋今日「用車報告」主角Helen都有同感，而且重覺得部車好易揸㖭！如果你都對光岡Galue1有好感的話，不妨留意吓Helen點睇部車喇！
記者：鄭達基 攝影：黃子偉
引擎：1998cc直6DOHC
馬力：130ps/5600rpm
扭力：17.5kgm/4400rpm
尺碼：4860×1730×1450mm
軸距：2665mm
車重：1285kg
新車售價：$413,300
查詢：恒昌汽車（23660910）
日本光岡（Mitsuoka）汽車由1968年2月成立至今，經已有35年歷史；雖然佢哋推出嘅車款唔多，但旗下以懷舊或稀有車種為賣點嘅車款，卻一直深受車迷歡迎；而除咗今日呢部Galue1外，佢哋重有Viewt、Zero1、Le-Seyda，同埋可自行組裝嘅MC-1等車系呢！講番Galue1，佢穩紮嘅底盤及機械結構，除予人有十足信心外，用上極富懷舊味嘅五、六十年代英式造型設計，一份自家獨特個性油然而生；不過較同級車高出一截嘅車價，就未必為部份車迷所能接受。
「喺買呢部光岡Galue1之前，我係揸開Benz嘅，不過覺得部車比較細唔係咁啱用，所以咪諗住換車囉！跟住就有朋友向我推介Galue1，話佢個樣夠靚之餘又夠Classic喎！其後我都有落Showroom睇過部車，可能因為我買車嘅首要重點，就係要外形有番咁上下吸引啦，所以當我一見到部車嗰陣就已經好鍾意，試完車就即刻落Order買車喇！」Helen笑着說。
Galue1既穩紮，可靠性又高嘅底盤及機械配搭，都能予人有十足信心；當中一台2.0公升直6DOHC偈除有不錯動力輸出數值外，而且重有低耗油量嘅特性，用作日常代步絕對適合不過。「部車除咗慳油夠力之外，睇位亦都好容易，就連出入較窄嘅停車場倒車泊位，又或者係Cut線爬頭都唔使忙碌地左顧右盼，揸起上嚟重覺得好舒服㖭！」Helen說。
Helen除咗覺得Galue1樣靚之外，響街上行走亦有一定號召力，「由去年啱啱出車到𠵱家，一揸親出街就一定惹來途人圍觀，可能街上唔係太多呢類車行啦！有時過隧道嗰陣，入口附近嘅車輛重會行慢些少讓俾我行先，可能佢哋想睇清楚部車係咩牌子同個樣啩！」除此之外，Helen最記憶猶新，會係有一次駕車時遇上塞車，旁邊一部校巴上嘅學生，突然聚集響一邊望住佢部車，就連校巴上嘅司機都回頭望一望，可想而知Galue1在街上嘅收視率係幾高呢！
「車廂畀到我嘅感覺係好闊落同舒服，就連後排都有闊落乘坐空間，所以有唔少坐過我車嘅朋友，都話坐得好舒服；而設備配搭亦都好齊全同易用，再加埋有桃木裝飾，望落好有豪華轎車嘅風範㗎！」Helen說。
如果你係車主，而座駕又已落地三個月以上，兼且重想與讀者分享你對座駕嘅感覺的話，我哋都願意將你嘅心聲寫成「用車報告」；有興趣嘅朋友，可利用以下方法同我哋聯絡。
傳真：27420542
電郵：
郵寄：香港將軍澳工業邨西駿盈街八號《蘋果日報》副刊「車天車地」版「用車報告」收
（來信請註明姓名、年齡、聯絡方法、車輛型號等資料）