香港國際七人欖球賽受到肺炎影響，入座率大不如前。贊助商為咗俾入場球迷一個安心，特別搵專人係球場外面派發口罩，呢招預防措施非常受歡迎，幾乎每個路過派發地點嘅球迷都有攞，甚至乎的士司機見到有着數，都停車攞埋一份。
雖然噚日嘅入場人數有回升迹象，但東西看台仍然有大量空位，相反大鐘底嘅南看台，由於一向係欖球賽球迷「玩嘢特區」，扮到五顏六色嘅球迷睇波之餘，有時兩杯落肚後更大跳辣身舞，咁好玩嘅南看台當然座無虛設，因此成個大球場只係南看台需要人流管制。
每次欖球賽，啤酒肯定係最受球迷歡迎嘅飲品，一邊睇波，一邊歎啤酒，實人生一大快事。不過，噚日班球迷似乎飲到有啲亂性，除裸跑（圖）外，亦鍾意用啤酒潑人，無論係警察、保安或記者，個個無一幸免，難怪五十蚊一杯，啤酒女郎依然賣到停唔到手。