中式飯不等於扒白飯，就算扒白飯，一樣可以好好味。
中式飯不是毫無變化，用心點想，我們有炒飯、泡飯、煲仔飯……
中國人不吃中式飯，抵打。
中國人不懂吃好的中式飯，更加抵打。
鳳城炒飯享譽50年，全因選米嚴謹，這不得不提總廚譚生，在鳳城出身的他60年代赴日本，曾在東京品川太平洋等高級酒店當中廚，78年回巢，眉頭大皺，原因有三：「一，覺得當時啲食肆根本唔重視飯嘅質素；二，發覺香港人唔係咁鍾意喫飯；三，日本米好味好多，就好似新潟秋田米咁，幾條泡菜已經送到兩大碗白飯。」
矜貴靚米一年得一造
為尋上等靚仔，譚生找相熟米商幫忙：「不斷試食，試咗十幾隻米，終於俾我試到嘞，白兔牌泰國米係最好味嘅！」此米矜貴極，市面無得賣，只得北角德利隆獨家供應，普通米一年兩造，此米卻一年只得一造：「摸上手，好乾身，食落口，好煙韌，煲飯有飯味，炒飯就粒粒分明，炒出嚟嘅飯一粒一粒睇得到，唔會黐埋一嚿嚿。」
銀根VS飯癮
香港人無飯癮，譚生很理解：「舊時窮，腐乳都撈到三碗飯；80年代香港起飛，富貴嘛，咪少飯多餸囉；97年過後，經濟差，講求經濟實惠，幾無飯癮嘅人都會食飯，飽肚嘛。」
炒飯VS白飯
鳳城很講究，白飯炒飯分開煲。白飯講求軟熟有飯味，故用多點水煲飯；炒飯要求乾身，故用少點水，上午煲飯，然後放涼，下午就可以用來做炒飯，絕不用隔夜飯。
鳳城炒飯$48
招牌菜，一句到尾，上等米炒出上等飯，簡簡單單蠔油炒蝦米、叉燒、茄粒，添些少葱花，只要鑊氣夠，粒粒金黃色的鳳城炒飯可以上碟。
蝦粒順德魚肚$68（前）
金銀桂魚卷$88（後）
靚餸配靚飯，前者選用香港無得賣的順德魚肚，薄身鮮味，蝦乾難得地無腥味；後者將原條桂魚起肉，包火腿、崧子落油炸，味甘香。
燒味拼盤 細$100
小插曲，84年始，鳳城首創燒味與白飯分碟上，譚生說：「燒味鋪喺飯面，熱飯嘅水氣會影響燒味嘅味道。」入正題，選用如手指般粗身的生腸，貪其更爽口；叉燒要蘸蜜芽糖吃，更香甜，燒味汁撈飯，永遠是絕配。
店名：鳳城酒家（23815261）
地址：旺角彌敦道749號1至2樓
營業時間：9:00am至11:00pm
泡飯，即廣東人說的湯飯，媽常說，白飯撈湯無益，是否無益及因何無益，媽卻說不出。
潮州人的媽，如潮州邨的陳太卻不會這樣說，因為潮州人愛吃泡飯：「我個女今年11歲，食泡飯大，咪一樣肥肥白白。」女兒澤媚：「我好鍾意食泡飯㗎，因為啖湯好好飲，啖湯好飲啲飯就自然好味，好味就會添飯啦。」答得真趣致。
簫氏夫婦說：「一星期嚟幾次，乜泡飯都鍾意食，就算唔堂食，都會買滷水鵝返屋企加餸。」
6至8両重紅蟹，連湯滾熟，澤媚有心得：「畀啲耐性，將啲蟹肉拆出嚟，放入湯，連飯一齊食就最好味。」
滷味師傅John哥堪稱打貓王，少說話，但口不停，最愛偷食：「實在太鍾意食滷味，鵝片啦，豬頸肉啦，一得閒我就係咁𡁻㗎嘞。」
精華盡在湯底，用大地魚、豬骨、蝦乾、雞殼、甘草枝、羅漢果、果皮、胡椒熬足4小時，很清甜，陳太說：「啖湯好味到啲客問我有無加味精，真令人氣憤！」
店名：潮州邨（28871801）
地址：天后電氣道130號地下
營業時間：10:30am至2:00am
添樂園的煲仔飯備受傳媒吹捧，問成師傅有何心得，答：「煲飯唔燶就好味囉。」那令人回味無窮的飯焦何來？「煲濃咗咪有飯焦囉。」前後矛盾？非也。「先講米，煲仔飯要揀唔新唔舊嘅米，煲出嘅飯就最靚。米同水要校啱比例，用猛火將米煲到8成熟，然後落餸，冚蓋，文火焗，焗熟啲餸就可以上碟，頂層嘅米啱啱熟透，底層嘅米受熱多，咪有飯焦囉！不過唔可以太燶喎，太燶煲飯會苦。」
薑葱魚腩煲$48（後）
煲仔菜由盧師傅負責，送飯一流，惹味皆因即叫即蒸：「出面啲煲仔菜，預早整定，有Order就係咁意放落砂鍋滾兩滾算數，離譜。」
北菇滑雞飯$34（後）
老闆親自調製的豉油，鹹中帶甜，秘方不傳夥計，煲仔飯之所以惹味，秘製豉油居功不少。
店名：添樂園（23822369）
地址：九龍城福佬村道4至6號地下
營業時間：7:00am至1:30am