大堆頭少女組合Morning娘，最近主持嘅節目《Hello！Morning》收視係咁下跌，為咗救亡，佢哋乜嘢丑角都肯扮，更加唔怕得罪前輩，將佢哋醜化！早幾日我羅拉就睇咗一集，講隊長飯田圭織變身木村拓哉嬌妻工藤靜香，簡直笑到我差啲胃抽筋。
呢個故事發生喺《Morning劇場》環節入面，內容好簡單，講高橋愛同小川麻琴兩個妹妹仔喺傳聞中木村同靜香嘅愛巢外苦等，希望見到偶像，當舊Morning娘隊長中澤裕子路過見到佢哋，重表錯情以為人哋搵佢簽名！其後飯田扮嘅靜香終於出現，不過佢猛話自己係「工藤靜江」，驚死人哋認得佢。
成個片段最搞鬼嘅地方，首推飯田嗰個十年前木村嫂重係紅透半邊天時代嘅鬆毛金髮加一字眉look，話晒木村嫂假假哋都係出名嘅一字眉美人，飯田就醜化佢整個Nike眉，同人簽名時個頭左fing右fing，又忘形到將個女心美交畀陌生人中澤抱，最後重唔記得帶番心美走㖭！如果現實中靜香真係咁，木村重唔早早飛咗佢！