去完南豐廣場睇樓盤，或多或少都會肚餓。原來喺坑口有好多正嘢食，例如喺坑口村就有明星經常出沒嘅海鮮店，返到嚟東港城又可以歎吓日本菜，林林總總，令人有意外驚喜。
由於鄰近TVB清水灣電視城，所以有不少明星都會嚟坑口村一帶嘅食肆幫襯。這間海鮮店開業已有4年半，由前鏞記師傅壓陣，因不時有明星出沒，所以又叫明星地踎飯堂，曾經光顧的明星就有郭晉安、吳家樂、羅嘉良、洪天明及錢嘉樂等人。重未諗好食乜菜，老闆已免費送上一碟沙薑雞腳畀我哋𡁻吓，認真體貼，呢度除咗招牌菜爆醬蝦丸和鹹蛋黃大蝦外，重有以下好選擇。
呢味蜜椒雞翼，食落口十分惹味，愛吃香口食物的人必定鍾意。先以油炸令肥美嘅雞翼熟透後，再以黑椒粒、椒絲配以蜜糖炒香，味道帶少辣卻十分惹味。
呢個屬新登場菜式，只推出了一個月，除咗有西蘭花外，更配了多種野生菌類如靈芝菇、金菇及草菇等，再加入芝士焗釀，營養高兼送飯一流。
食得妙海鮮火鍋飯店
電話：23355638
地址：將軍澳坑口村30號地下
營業時間：中午12:00至凌晨1:30
洞蜜園主要以甜品作招徠，所以客路甚廣，除咗街坊鄰里幫襯外，原來不少本報同事亦經常去買外賣。
煎蘿蔔糕大家就食得多，但炸嘅唔知有幾多人試過。一客有十件，入口脆中帶軟，蘸埋甜醬或辣椒醬更滋味。
有雪蛤又有十多款生果及涼粉，睇外貌已吸引，難怪有咁多OL都跑去幫襯。
洞蜜園
電話：28381868
地址：將軍澳坑口村24號地下
營業時間：下午3:00至凌晨2:00
這裏以拉麵出名，拉麵定食就最多食客幫襯。另外，佢哋推出嘅日本壽司味道及賣相均十分不錯，皆因有位入廚30年嘅日本壽司師傅坐鎮。
原來唔止四川有擔擔麵，日本嘅橫濱都有，味道帶微辣，愈食愈開胃。套餐另有雜錦天婦羅及甜蝦、玉子、三文魚、鰻魚、八爪魚等五款壽司。
麵 電話：26286092
地址：將軍澳東港城112號舖
營業時間：
（平日）11:30am至2:30pm；5:30pm至11:00pm
（假日）12:00noon至3:30pm；5:30pm至11:00pm
想喺將軍澳搵正宗嘅上海地道菜，不妨試試呢間滬川料理。廚房清一色上海幫，食物自然夠地道，其中小籠包最吸引。
小籠包餡料豐富，皮薄汁又多，一咬落口湯汁四溢，鮮味十足。而蘿蔔絲酥餅外層酥香鬆化，綴以火腿吊味，令蘿蔔絲餡料更覺惹味。
來得鮮滬川料理
電話：21772612
地址：將軍澳銀澳路1號G1、G2號舖
營業時間：
11:00am至3:00pm；6:00pm至11:30pm
攞獎雲吞麵
呢間擁有8間連鎖店的粥麵店，憑一碗雲吞麵，就贏咗由香港旅遊發展局舉辦嘅2001年美食大獎中麵食組嘅金獎，8間店每日可以賣出1萬碗之多。
原來雲吞麵有3大重要口感，第一係要麵夠彈牙，彈得嚟煙韌，韌得嚟夠爽口；其次係雲吞，雲吞用鮮蝦及嫩口豬肉眼，包到鬆身及細粒，一啖食晒為標準，即包即煮。至於湯底則以大地魚熬6個鐘，真係唔簡單。
好好粥麵
電話：26287088
地址：將軍澳東港城160?61號舖
營業時間：上午11:30至晚上10:00
呢間食肆頂手約一年，以平、靚、正的海鮮作招徠，由於經常有新菜式推出，所以生意都唔錯。除咗做街坊生意之外，不時亦有明星如陳煒、歐陽佩珊等藝員幫襯。
師傅先用新鮮墨魚膠撈埋小棠菜一齊煎香，然後切件上碟。食落口墨魚膠幾爽口，外層亦夠鬆脆，拌以沙律醬或甜酸醬享用，的確香口。
宜興食館
電話：27059111
地址：將軍澳坑口村26號地下
營業時間：上午11:30至凌晨2:00