近日肺炎虐肆，唔單止影響各行各業，就連去睇新樓盤示範單位嘅市民亦減少。不過就我所見，將軍澳廣場可算是個例外，或許是此樓盤乃加稅後賣得最平嘅屋苑，故依然有一定叫座力，只見市民戴着口罩，留心的到處參觀，睇吓是否值得入市。
記者：梁煒健 攝影：周旭文
Model：Winnie（KOne）
將軍澳廣場的低層單位，曾以每平方呎$1,688發售，吸引咗無數準買家睇樓兼趁平入市，即使高層較貴的大單位亦見搶手。到樓盤參觀了一趟，發覺其間隔尚算四正，附近又有地鐵站，交通夠晒方便，再加上以低價發售，絕對適合小康之家作為上車樓盤。
地址：將軍澳唐德街1號
發展商：南豐發展有限公司
單位總數：2,880個
大廈座數：8座
建築面積：569?,026平方呎
實用率：約80%
平均呎價：$2,430
管理費：$1.3/每方呎
查詢電話：21773070
示範單位：坑口南豐廣場
開放時間：12:00noon-8:00pm
加稅後首個新盤將軍澳廣場，曾廉售3個小時賣出50個單位，算是近期不俗的賣樓成績。該樓盤首推兩期，以第一期第1、2、3、3A座較搶手，皆因可以喺年底入伙，而第二期的第5至第8座，亦將於明年3月尾入伙。而每座共有45層，由3至56樓，但不設4、14、24、34、40、44、47及53字樓，共2,880個單位。由於平均呎價低至$2,430，所以買家踴躍，到目前為止已成功售出1,200個單位。
近期參觀樓盤已少見人頭湧湧的盛況，今次卻罕有的鼎盛，其中不乏原本居住於將軍澳的居民。今次的示範單位共有3種，分別為2房2廳的611呎、3房2廳的692呎，以及3房2廳的1,026呎(另有工人房)。據現場訪問所得，大部份準買家均喜歡購入大單位，而對屋苑的設施均有正面回應。我睇完示範單位，覺得房間雖然較細，但間隔尚算實用，而且附送的爐具、冷氣機均為質優的名牌貨，而廁所配套亦令人滿意。
此樓盤位於將軍澳市中心，毗連將軍澳地鐵站，往返中環只需22分鐘，而前往旺角亦只需26分鐘，這樣的快捷交通，亦是令買家踴躍入市的原因之一。至於學校網，鄰近的中、小學校及幼稚園亦有很多選擇，不愁子女日後的升學問題。
楊女士（主婦）：有地鐵十分方便！
「我主要係睇1,026呎嘅3房2廳大單位，雖然只係我一個人住，但自己住個大單位比較舒服啲。我𠵱家住緊北角，搬嚟將軍澳都冇問題，因為有地鐵十分方便。」
陳先生（飲食業）：間隔幾四正！
「我同家人都住喺將軍澳區，所以想睇吓呢度嘅環境。其實每個新樓盤嘅間隔都相差無幾，而呢度嘅單位都好四正，設施亦唔錯。我會揀個980呎嘅單位，200幾萬合乎我嘅Budget。」
周太（主婦）：九成買呢度！
「我𠵱家住喺灣仔，由於我家婆住喺呢度，所以就揀咗呢處。睇啱咗一個兩房兩廳嘅569呎細單位，以中層計每平方呎約$2,300算合理，我有9成機會買呢度。」