保安局局長葉劉淑儀噚日再戰江湖講二十三條，令人眼前一亮。除咗條紅色絲巾，全身上下都係白，一於以「白色恐怖Look」出席中大評議會嘅二十三條座談會。
狀態十足嘅葉劉全程不停旁徵博引，由英國一宗以「性幻想」作辯護嘅案件，講到荷李活電影，先後引《虎膽龍威》同《叛艦喋血記》解釋暴力同叛變行為，不過八方好奇怪，葉劉提起三十年代老片《叛艦喋血記》係咪另有深意？
呢齣戲當年由查理斯萊登（CharlesLaughton）同奇勒基寶（ClackGable）主演，內容係講十八世紀一個剛愎自用嘅英國船長布賴，不顧船員死活，最終其手下奇勒基寶為追求人性尊嚴同自由，密謀叛變，將佢趕上小艇放逐南太平洋。如果葉劉想藉此說明唔應該叛變，似乎揀錯例子。唔通葉劉想講，香港現時嘅領導人如果仍然好似布賴船長咁專橫、唔肯聽人意見，遲早搞到大家一齊揭竿起義？咁呢齣戲好啱特首睇喎！
葉劉坐咗個半鐘就趕住走，好在有保皇派楊耀忠抵得諗，全場變身「男版葉劉」，所有專門嘅法律問題都搶住答，樣樣都話唔會咁易入罪，實在唔識答，竟然搶埋葉劉句台詞指揮：「阿尹律師，你答吓呢個問題！」律政司高級政府律師尹平笑，俾葉劉點完又俾楊耀忠點，重笑唔笑得出呢？
（圖）葉劉以一身白配紅絲巾出席中大評議會嘅二十三條座談會。
傳真︰2623-9278
電郵︰