最近非典型肺炎沖淡咗阿松偷步買車件事，但係噚日港台節目《清談一點鐘》請咗政府新聞處處長蔡瑩璧﹙圖﹚做嘉賓，主持除咗問政府點樣發放非典型肺炎消息外，重問處長究竟喺偷步買車事件入面，新聞處有冇做嘢呢？
雖然處長因為要開夜，噚日精神麻麻，但一講到阿松買車，就立刻小心翼翼，先講明自己唔想喺呢個問題上再講嘢，然後再澄清新聞處收到傳媒查詢，會轉交畀有關局長新聞秘書處理，言下之意即係劃清界線，局長有乜三長兩短，就唔關新聞處事，佢哋不過係傳吓話。
至於阿松處理件事係咪唔夠迅速，處長話一般講，就梗係愈快愈好，𠵱家睇番轉頭，其實都可以處理得好少少。處長一向識大體係行家都知，好似上次喺北京私下「教精」記者，叫佢哋唔好喺老董見領導人時問佢民望下跌一事。阿松應該一早搵處長教路啦！
傳真︰2623-9278
電郵︰