人紅了，緋聞便隨之而來，阿Jade早前與蕭正楠合作拍網上劇後，二人的緋聞即鬧得熱烘烘，但自近期傳出男方追求李彩樺（Rain）的報道，阿Jade與蕭正楠的關係似乎急劇降溫，阿Jade甚至決絕地說：「佢唔係我要搵嘅男朋友，notmycupoftea（不是我那杯茶）。」
而近期又有雜誌刊登阿Jade以前與唐文龍行街拖手的照片，看來阿Jade的感情生活，相當精采。
提起唐文龍的緋聞，阿Jade就說：「我有好多男性好朋友，佢係我其中一位，我當佢好似大佬，大家都係朋友嚟啫，我同佢冇機會發展。」
而對於蕭正楠狂追阿Rain，問阿Jade會否覺得甩難？她卻一臉茫然地說：「我真係唔知喎。我同佢由始至終都唔係，我哋只不過因為一齊合作至俾人傳，我唔會介意。但𠵱家大家都冇合作，無喇喇就唔好再攞嚟講。女仔呢啲record多就死喇，我第日要嫁㗎，好多人睇過就當係，連我阿媽同屋企人都走嚟問我。」
對於蕭正楠的為人，阿Jade只淡淡然地說：「冇乜嘢，幾搞笑呀。」她更強調不覺對方有追求之意，她說：「唔係追，我哋都唔係一齊，只係大家咁啱合作啫，佢唔係我要搵嘅男朋友，如果我拍拖，我會公開㗎。」
不過，阿Jade自言要找另一半實在不易，她說：「做我男朋友嘅話，都幾難同我相處，可能係我性格問題，太過自我，太過硬，又唔識溫柔，留唔住啲男仔，我知自己嘅問題，但喺呢一刻好難改善。我𠵱家要為事業奮鬥，我唔想玩火，做朋友冇所謂，講拍拖就難喇，我要求太高咯。」
阿Jade又說：「我係普通人，唔係尼姑，我都會寂寞，但我𠵱家真係冇時間，希望到三十歲嘅時候，可以結婚啦。」
