市面口罩供應短缺，喺中環街頭見到零零星嘅打工仔戴口罩返工，「鏞記」負責傳菜嘅夥計亦戴上口罩，於是省起都怕要買番啲口罩傍身；行咗一輪，屈臣氏與勝利藥房都冇得賣，惟有作罷。返到屋企，老婆話買到好平嘅口罩，望真啲，大陸製造，兩塊紙用釘書機釘埋一齊，嘩，容乜易刮損塊面，點用呀！
一位讀者署名家庭主婦，來函投訴某大連鎖店W記尖沙嘴分店坐地起價，將一盒裝三十個嘅口罩，原價三十蚊一盒，分拆為每盒兩個，每盒賣十四蚊，讀者指責W記謀取暴利，於理不合。照呢位讀者講法，本來賣三十蚊嘅貨物現售二百一十蚊，咪賺到飛起？大集團會唔會咁做呀？碰啱沙田陳師奶個弟婦喺北京道寫字樓返工，於是叫佢去仄吓。姨仔話：「尖沙嘴有幾間W記，唔得閒去晒，就近去漢口道分店睇吓就算咯。」
問過之後，新返到港嘅3MDentalMask（牙醫口罩）一包兩個，每包賣十四蚊，即係七蚊一個3M口罩，應該唔算貴。價錢重平啲嘅有J&J口罩，每包十個，賣三十蚊；冇牌子嘅，每包十二個賣二十蚊；甚麼3M8210N95，最貴，十一蚊一個。如此說來，讀者來函所指嘅十四蚊兩個口罩，應該就似係3M牙醫口罩，照計平時點都唔會每個賣一元五角咁便宜，讀者可能誤會咗咯。口罩有唔同牌子、唔同質地，價錢當然亦有分別。讀者（家庭主婦）請再仄清楚，多謝來函。