上個禮拜個個談起肺炎色變，今次同上次禽流感唔同，係會人傳人，重係高度傳染性，所以好多人周圍撲口罩同埋消毒藥水，一個幾毫子嘅口罩被炒到十幾蚊，賺足十幾個開，計落條數，炒一轉口罩好過炒一轉股仔，唔怪得愈來愈少股民入市炒股票喇！
上星期唔單止肺炎菌嚇親股民，重有啲好得人驚嘅情景出現，皆因有多隻旅遊及酒店相關嘅股份，預期盈利會受呢單消息所影響，因而俾班大戶好似洗倉咁狂插，部份單日重跌成6個巴仙以上，尤其係隻經營香港至梳打埠航運嘅信德（242）咁，股價由前一個星期五最高接近2.2元，一路被掟到上星期五嘅1.89元，一星期唔見咗一成三有多。
有行家話，隻股喺未跌之前已經有唔少大戶準備隊低嚟收貨，呢單新聞正好用作插低隻股嘅藉口。由於隻股重係好有澳門賭牌概念，加埋班大戶到𠵱家個水平重未夠喉，所以跌落嚟之後會再出嚟買過，如果有幸見到1.7元，不妨買啲嚟坐下，當搭一轉順風車。
上星期提過嗰隻孖一六九雖然已否認話有中方人士向麥老闆買番佢手上嘅貨，澄清之後，隻股的確係回到去近兩毫嘅水平，不過上星期四又再發力，周五最高見過兩毫八，成交額重大番晒。照伏勝嘅經驗睇，咁嘅情形絕對唔似係冇料到，有幾個做開大行嘅朋友話，前個星期無端端有幾個大陸客千里迢迢由青島落嚟香港開戶口，不問分由咁擺低成千萬現金喺個卜架度，最關鍵嘅重係開始掃隻海爾中建（1169），喺咁多線索支持下，話隻股仔冇事發生真係講都無人信。
伏勝