日本超人氣搖滾妖男歌手Gackt，聯同樂隊L'Arc~en~Ciel主音hyde、台灣歌手王力宏和女星郭善璵等，前日在東京齊齊出席新片《MOONCHILD》的記者會及首映禮。Gackt自言此以未來世界作背景的科幻影片反映現實，更呼籲大家要為自己的未來做一點事。
由Gackt構思的電影《MOONCHILD》，以二○一四年日本崩壞後的亞洲作背景，片中Gackt與hyde攜手對付黑幫，中途碰上妹妹遭黑幫強暴的王力宏。
Gackt前日在首映禮上向七百名觀眾說：「因為上年去到台灣拍片，令我可以由外國嘅角度更細心去思考日本呢個地方。戲入面嘅世界其實好似𠵱家嘅世界，希望可以推動大家為未來做番一啲嘢。」
至於由Gackt欽點擔任其拍檔的hyde，在會上提到與Gackt合作的趣事時說：「喺台灣拍嘢嘅時候，我哋好似讀書去夏令營玩咁開心。有日工作人員特登買咗兩支木結他，畀我同Gackt為套片一齊作首歌，作好曲之後Gackt肚餓要食飯，佢一食完飯返嚟，即刻同我講佢已經諗好歌詞同編曲㖭！原來佢食飽就會充滿靈感。」而一向搞笑的Gackt則說：「我淨係記得嗰日食嘅餃子好好味。」
而憑《MOONCHILD》正式進軍日本的王力宏，當日除獲藤原紀香送上花牌外，更有不少fans舉起紙牌到場為他打氣。王力宏則說盡國語、日文、英文及以示愛手勢冧fans，他說：「係Gackt教我㗎！」
特約記者森林檎東京直擊